රියඅනතුරුවලින් සිව්දෙනෙක් මරුට -අඹුසැමි යුවළකුත් ඒ අතර
දිවයිනේ ප්රදේශ කිහිපයක සිදුවූ අනතුරුවලින් කාන්තාවක් ඇතුළු පුද්ගලයින් සිව්දෙනෙක් ජීවිතක්ෂයට පත්ව තිබේ.
ඇල්පිටිය, අවිත්තාව මාර්ගයේ සිදුවූ රිය අනතුරකින් අඹුසැමි යුවළක් මියගොස් ඇත.
පොලීසිය සඳහන් කළේ, බස්රථයක් ඉදිරියෙන් ගමන් කළ යතුරුපැදියක ගැටී පසුව බස්රථය පාලනය කර ගැනීමට නොහැකිව ඉදිරියෙන් පැමිණි තවත් යතුරුපැදියක ද ගැටී එම අනතුර සිදුව ඇති බවය.
අනතුරින් බරපතළ තුවාල ලැබූ ඉදිරියෙන් පැමිණි යතුරුපැදියේ යතුරුපැදිකරු සහ පසුපැදිකාරිය ඇල්පිටිය රෝහලට ඇතුළත් කිරීමෙන් පසු මියගොස් තිබේ.
මියගොස් ඇත්තේ 50 හැවිරිදි සහ 47 හැවිරිදි ඕපාත ගනේගොඩ ප්රදේශයේ පදිංචි අඹුසැමි යුවළකි.
අනතුර සම්බන්ධයෙන් බස් රථයේ රියදුරු සහ අනතුරට පත්අනෙක් යතුරුපැදියේ පැදිකරු අත්අඩංගුවට ගත් බව පොලීසිය සඳහන් කළේය.
මේ අතර කඩවත පොලිස් වසමේ කොළඹ – මහනුවර මාර්ගයේ ඇල්දෙණිය ප්රදේශයේ දී මහනුවර සිට කොළඹ දෙසට ධාවන වූ ලොරි රථයක මාර්ගය හරහා ගමන්ගත් පදිකයෙකුගේ ගැටී අනතුරක් සිදුව ඇත.
අදාළ අනතුරින් මියගොස් ඇත්තේ කඩවත ප්රදේශයේ සිටින යාචකයෙකු බව පොලීසිය පවසයි.
මේ අතර මහියංගන – පදියතලාව මාර්ගයේ පදියතලාව දෙසට ධාවනය වූ ත්රීරෝද රථයක මාර්ගය හරහා ගමන්ගත් පදිකයකුගේ ගැටී අනතුරක් සිදුව ඇත.
අනතුරින් තුවාල ලැබූ පදිකයා මහියංගනය රෝහලට ඇතුළත් කිරීමෙන් පසු මියගොස් තිබේ.
එලෙස මියගොස් ඇත්තේ 58 හැවිරිදි මහියංගනය ප්රදේශයේ පදිංචිකරුවෙකි.
