කෘෂිකාර්මික නොවන කර්මාන්ත සඳහා අවශ්‍ය රසායන ද්‍රව්‍ය පූර්ව අනුමැතියකින් පසුව ගෙන්වීමට අවසර ලබා දෙන බව ආනයන අපනයන පාලක ජනරාල්, දමයන්ති කරුණාරත්න මහත්මිය පැවසුවාය.
අදාළ කර්මාන්තවල අවශ්‍යතාව තහවුරු කර ගැනීමෙන් පසුව ඒ සඳහා අවශ්‍ය බලපත්‍ර ඉදිරියේ දී ලබාදීමට කටයුතු කරන බවද ඇය සඳහන් කළාය.
මේ පිළිබඳ වැඩිදුරටත් අදහස් දැක්වු දමයන්ති කරුණාරත්න මහත්මිය,
“මේ වන විටත් ඇතැම් පොහොර, කෘමිනාශක වර්ග ආනයනයට යටත් කරලා තිබුණේ ආනයන ආනයන පාලන පනත යටතේ. එයින් ආවරණය නොවුණ කාණ්ඩයන් අපි කෘෂිකර්ම දෙපාර්තමේන්තුවෙන් හා අනෙක් අදාළ දෙපාර්තමේන්තු සමඟ සාකච්ඡා කරලා ඒවා හඳුනාගෙන සම්පූර්ණයෙන් ම තහනම් කරා. ඒ හැර අනෙකුත් සියලුම හඳුනාගත් රසායනික ද්‍රව්‍ය ආනයන පාලනයට යටත් කරලා තියෙනවා. ඒ අනුව කෘෂිකර්මාන්තයට මේ පොහොර හෝ රසායනික ද්‍රව්‍ය කෘමිනාශක යොදා ගන්න බෑ. නමුත් වෙනත් කර්මාන්තයක් සඳහා අවශ්‍ය රසායනික ද්‍රව්‍යයක් වේ නම් ඒ බව තහවුරු කර ගෙන අවශ්‍ය ප්‍රමාණයට අනුව ආනයන බලපත්‍ර ලබාදීමට ඉදිරියේ දී කටයුතු කරනු ලබනවා.“
මේ අතර, ආණ්ඩුවේ පොහොර තහනම තවත් රඟපෑමක් විය හැකි බව ගයන්ත කරුණාතිලක මන්ත්‍රීවරයා පවසයි.
ඔහු පවසන්නේ රසායනික පොහොර කඩිනමින් තහනම් කිරීම මෙරට ගොවි ජනතාවට දරාගත නොහැකි තත්ත්වයක් බවය.
අද (09) පැවැති මාධ්‍ය හමුවකදී ගයන්ත කරුණාතිලක මන්ත්‍රීවරයා මේ බව කියා සිටියේය.
