කොළඹ වරාය ආසන්නයේ නැංගුරම් ලා ඇති “එක්ස්ප්‍රස් පර්ල්” නෞකාවේ හටගත් ගින්න පිළිබඳ නෙදර්ලන්ත විශේෂඥයින් විමර්ශන ආරම්භ කර තිබේ.
ඊයේ (22) රාත්‍රියේ දිවයිනට පැමිණි එම විශේෂඥ කණ්ඩායම මේ වන විට නෞකාව පිහිටි ස්ථානයට ගොස් විමර්ශන ආරම්භ කර ඇති බව සමුද්‍රීය පරිසර ආරක්ෂණ අධිකාරියේ සභාපති නීතිඥ දර්ශනී ලහදපුර මහත්මිය පැවසුවාය.
නෞකාවේ හට ගත් ගින්න හේතුවෙන් පාරිසරික හානියක් සිදුව ඇද්ද යන්න පිළිබඳ විමර්ශන සිදුකිරීම සඳහා අදාළ ස්ථානයෙන් ලබාගත් ජල සාම්පල මේ වන විට රසායනාගාර වෙත යොමු කර ඇති බව ද සභාපතිවරිය සඳහන් කළාය.
රසායනික ද්‍රව්‍ය ගබඩා කර ඇති අදාළ නෞකාවේ හටගත් ගින්න පාලනය කිරීම සඳහා නාවික හමුදාව, ගුවන් හමුදාව සහ ශ්‍රී ලංකා වරාය අධිකාරිය තවදුරටත් මෙහෙයුම් සිදුකරන බව නාවික හමුදාව සඳහන් කළේය.
මේ අතර අදාළ නෞකාවේ හටගත් ගින්න මැඩපැවැත්විමේ මෙහෙයුම් සඳහා මෙරට ආයතන විසින් දරන පිරිවැය නෞකාව අයත් රක්ෂණ සමාගමෙන් අයකර ගැනිමට පියවර ගන්නා බව වරාය හා නාවික කටයුතු අමාත්‍ය රෝහිත අබේගුණවර්ධන මහතා පැවසුවේය.
