සුගතදාස ගෘහස්ථ ක්‍රීඩාංගණයට අනුබද්ධ සුගතදාස හෝටලයේ නිරෝධායනයට ලක් වී සිටි ඉන්දියාවේ පකියලා නුවර පැවති අන්තර් ප්‍රාන්ත මලල ක්‍රීඩා කණ්ඩායමේ ක්‍රීඩක ක්‍රීඩිකාවන් (03) වැනිදා රාත්‍රියේ නිරෝධායන නීති උල්ලංඝණය කරමින් මත්පැන් සාදයක් පැවැත්වීම සම්බන්ධයෙන් සුගතදාස ක්‍රීඩාංගණයේ පාලනාධිකාරිය විසින් ඊයේ (04) දින ක්‍රීඩා හා තරුණ කටයුතු අමාත්‍ය නාමල් රාජපක්ෂ මහතාට පැමිණිලි කර ඇති බව වාර්තා වේ.
මෙම ක්‍රීඩක ක්‍රීඩිකාවන් නිරෝධායන නීති රීති උල්ලංඝනය කරමින් මත්පැන් සාදය පවත්වන විට ඔවුන් භාරව සිටි නිලධාරීන් ද ඊට කිසිදු විරෝධයක් නොදක්වා නිසොල්මනේ හිටි බවට ද ක්‍රීඩා හා තරුණ කටයුතු අමාත්‍යවරයාට ඉදිරිපත් කර ඇති පැමිණිල්ලේ සඳහන් වේ.
ක්‍රීඩක ක්‍රීඩිකාවන් 10 දෙනෙකු සහ නිලධාරීන් දෙදෙනෙකුගෙන් සමන්විත මෙම මලල ක්‍රීඩා කණ්ඩායමට පාසල් යන වයසේ පසුවන ක්‍රීඩක ක්‍රීඩිකාවන් සිටින බවටද එම පැමිණිල්ලේ වැඩිදුරටත් සඳහන් කර තිබේ.
ඉන්දියාවේ පකියලා නුවර පැවති අන්තර් ප්‍රාන්ත මලල ක්‍රීඩා තරගාවලියට සහභාගි වූ මෙම මලල ක්‍රීඩා කණ්ඩායම පසුගිය 02 වැනිදා අලුයම 2.00 ට පමණ කටුනායක ජාත්‍යන්තර ගුවන් තොටුපොළින් මෙරටට පැමිණ ඇත.
නිරෝධායනය කිරීම සඳහා සුගතදාස හෝටලයට තමන්ව රැගෙන යනු ඇතැයි එම මලල ක්‍රීඩා කණ්ඩායම බලාපොරොත්තු වුව ද නිරෝධායනය කිරීම සඳහා ඔවුන්ව රැගෙන ගොස් තිබෙන්නේ මාතර නිල්වලා විද්‍යා පීඨයෙහි පිහිටි නිරෝධායන මධ්‍යස්ථානයටයි.
තමන්ව සුගතදාස හෝටලයේ නිරෝධායනයට ලක් නොකොට මාතර නිල්වලා විද්‍යා පීඨයෙහි නිරෝධායනයට ගෙන යාම සම්බන්ධයෙන් මෙම මලල ක්‍රීඩා කණ්ඩායම තම නොසතුට පළකර ඇති අතර ඒ ගැන ක්‍රීඩා හා තරුණ කටයුතු අමාත්‍යාංශයට ද පැමිණිලි කර තිබේ.
ක්‍රීඩා හා තරුණ කටයුතු අමාත්‍ය නාමල් රාජපක්ෂ මහතාගේ මැදිහත්වීමෙන් මෙම මලල ක්‍රීඩා කණ්ඩායම ඉතා කඩිනමින් සුගතදාස හෝටලයේ නිරෝධායනය වීමට කටයුතු කර තිබේ.
එසේ සුගතදාස හෝටලයේ නිරෝධායනයට ලක් වෙමින් පවතින විට (03) වැනිදා රාත්‍රියේ මෙම පිරිස මත්පැන් සාදයක් පැවැත් වූ බව මෙම පැමිණිල්ලෙහි සඳහන් වී තිබේ.
ක්‍රිකට් ක්‍රීඩකයින් මීගමුවේ සුපිරි හෝටල්වල නිරෝධායනය වන විට තමන්ට කුඩම්මාගේ සැළකිළි ලැබුණ බව ප්‍රකාශ කළ මෙම මලල ක්‍රීඩක ක්‍රීඩිකාවෝ නිරෝධායන නීති රීති මෙසේ උල්ලංඝනය කරමින් මත්පැන් සාද පවත්වන්නේ කෙසේද? යන ප්‍රශ්නය මතු වී ඇත.
