ශ්‍රී ලංකා කණ්ඩායමේ ආරම්භක පිතිකරු පැතුම් නිස්සංකගේ ආබාධ තත්ත්වය පිළිබඳව මේ වනවිට විශේෂ ආරංචියක් ඔස්ට්‍රේලියාවෙන් ලැබී තිබේ.
එම ආරංචි මාර්ග සඳහන් කරන්නේ පැතුම් නිස්සංකගේ ආබාධ තත්ත්වය එතරම් බරපතළ නොවන බවය.
ඒ අනුව ඔහු සුපිරි 12 දෙනාගේ වටයේ ශ්‍රී ලංකාව සහභාගී වන පළමු තරගයට එක්වීමට නියමිතව ඇත.
නෙදර්ලන්තයට එරෙහිව අද පැවති තරගය අතරතුර පැතුම් නිස්සංක පාදයේ ආබාධයකට ලක්වූ බවට තොරතුරු වාර්තා විය.
වැඩිදුරටත් තොරතුරු වාර්තා වූයේ අනතුරුව ඔහු ස්කෑන් පරීක්ෂණයකට භාජනය කර ඇති බවය.
එම පරීක්ෂණවලට අනුව ඔහුගේ තත්ත්වය එතරම් බරපතල නොවන බවට අනාවරණය වී ඇත.
මේ අතර ශ්‍රී ලංකා ක්‍රීඩක ප්‍රමෝද් මදුෂාන්ගේ තත්ත්වයද බරපතල නොවීම හේතුවෙන් ඔහුට ද සුපිරි 12 වටයේ පළමු තරගයට එක්වීමේ අවස්ථාව හිමිවන බව ආරංචි මාර්ග සඳහන් කරයි.
