අයවැය දෙවන වර කියවීමේ විවාදය අද
පාර්ලිමේන්තුව අද (18) පෙරවරු 9.30 රැස්වීමට නියමිත අතර අයවැය දෙවන වර කියවීමේ විවාදය එහිදී පැවැත්වීමට නියමිතය.
අද සිට ලබන 21 වනදා දක්වා අයවැය දෙවන වර කියවීමේ විවාදය පැවැත් වේ.
අයවැය දෙවන වර කියවීමේ ඡන්ද විමසීම නොවැම්බර් 21වන දින පස්වරු 05.00 ට සිදු කිරීමට නියමිත ය.
අයවැය කාරක සභා අවස්ථා විවාදය නොවැම්බර් 23වන දින සිට දෙසැම්බර් 10 වනදා දක්වා පැවැත්වෙන අතර තෙවනවර කියවීමේ ඡන්ද විමසීම දෙසැම්බර් 10 වන දින පස්වරු 05.00ට සිදු කෙරෙනු ඇත.
2021 වර්ෂයට අදාළ අයවැය වාර්තාව මුදල් අමාත්ය, අග්රාමාත්ය මහින්ද රාජපක්ෂ මහතා විසින් ඊයේ (17) පාර්ලිමේන්තුවට ඉදිරිපත් කරනු ලැබීය.
අයවැය ඉදිරිපත් කිරීමෙන් අනතුරුව සාම්ප්රදායික තේ පැන් සංග්රහය පාර්ලිමේන්තු මන්ත්රීවවරුන්ගේ භෝජනාගාරයේ දී පැවැත්විණි.
ඉන් අනතුරුව පක්ෂ විපක්ෂ මන්ත්රිවරුන් 2021 අයවැය සම්බන්ධයෙන් අදහස් පළ කළ අතර එහිදී, අමාත්ය වාසුදේව නානායක්කාර මහතා ප්රකාශ කළේ දේශීය නිෂ්පාදන ඉහළ නැංවීමට ආනයනයන් මත යැපීමෙන් තොර ශක්තිමත් ආර්ථිකයක් ගොඩනැගිය හැකි අයවැයක් ඉදිරිපත්කර ඇති බවය.
ප්රායෝගික නොවන ඉතා දුර්වල අයවැයක් රජය විසින් ඉදිරිපත් කළ බව සමගි ජනබලවේගයේ පාර්ලිමේන්තු මන්ත්රී අචාර්ය හර්ෂ ද සිල්වා මහතා පැවසීය.
කෝප් කමිටු සභාපති මහාචාර්ය චරිත හේරත් මන්ත්රීවරයා පැවසුවේ ජනාධිපතිවරයාගේ ප්රතිපත්ති ප්රකාශය ක්රියාවට නැංවිය හැකි සැළැස්මක් ලෙස මෙවර අයවැය හැඳින්විය හැකි බවය.
ජාතික ආරක්ෂාව ශක්තිමත් කිරීම සඳහා ප්රමාණවත් මුදල් වෙන්කිරීමක් හෝ නව සැළසුම් සකස් කිරීමක් මෙවර අයවැය තුළ දක්නට නොමැති බව පාර්ලිමේන්තු මන්ත්රී සරත් ෆොන්සේකා මහතා ප්රකාශ කළේය.
අයවැය පිළිබඳ නිසි අවබෝධයක් නොමැතිව විපක්ෂයේ මන්ත්රීවරුන් විවිධ අසත්ය ප්රකාශ සිදුකරන බව රාජ්ය අමාත්ය ශෙහාන් සේමසිංහ මහතා සඳහන් කළේය.
