2022 වසරේ මැයි 13 වනදා වනවිට මෙරට පැවති ඖෂධ හිඟය සම්බන්ධයෙන්ද විගණකාධිපතිවරයා විශේෂ විගණන වාර්තාවක් සකස් කර තිබුණි.
ඒ අනුව වෛද්‍ය සැපයීම් හිඟය ඇතිවීමට ආසන්නතම හේතුව විනිමය හිඟය වුවද වෛද්‍ය සැපයුම් කළමනාකරණය සඳහා ස්ථාපිත කර තිබුණු පරිගණක පද්ධතිය නිසිලෙස යාවත්කාලීන කර නොතිබීම හා එය නිසිලෙස භාවිතය නොගැනීමත් ඖෂධ හිඟය ඇතිවීමට ප්‍රධාන හේතුවක් ලෙස එහි සඳහන්ය.
සෞඛ්‍ය අමාත්‍යාංශය,එහි රාජ්‍ය අමාත්‍යාංශය,වෛද්‍ය සැපයීම් අංශය, රාජ්‍ය ඖෂධ නීතිගත සංස්ථාව හා රාජ්‍ය ඖෂධ නිෂ්පාදන සංස්ථාව යන රාජ්‍ය ආයතන අතර මනා සම්බන්ධීකරණයක් නොතිබීමත්ද ඊට බලපා ඇතැයි මෙහිදී නිරීක්ෂණය වී තිබේ.
වැදගත් හා අත්‍යවශ්‍ය ඖෂධ 41කට අදාළ ඇණවුම් ලැයිස්තු වසරේ මුල් මාස දෙකෙහිදී පරිගණක පද්ධතිය මගින් රාජ්‍ය ඖෂධ නීතිගත සංස්ථාව වෙත නිකුත් කර තිබූ නමුත් එම ඇණවුම් ලැයිස්තුවල ලිඛිත පිටපත් සංස්ථාවේ ආනයනය අංශයට ලැබීමට දින 18ත් මාස 06ත් අතර කාලයක් ගතවී තිබූ අතර එක් ඇණවුම් ලැයිස්තුවක ප්‍රමාදය එම ලැයිස්තුවේ ඖෂධ අයිතම සියල්ලටම බලපාන බව නිරීක්ෂණය වී ඇත.
ඖෂධ ඇණවුම් කිරීමේ සිට තොග ලැබෙන අවස්ථාව දක්වා එක් එක් පියවර පද්ධතියට ඇතුළත් කර ඇණවුම සම්බන්ධ ප්‍රගතිය යාවත්කාලීන කිරීමේ පහසුකම අදාළ සියලු ආයතන වෙත ලබාදී ඇති නමුත් රාජ්‍ය ඖෂධ නීතිගත සංස්ථාවේ නිලධාරීන් ඇණවුමට අදාළ තොරතුරු වසර 7ක් තිස්සේ පැවති තාක්ෂණික ගැටලුවක් හේතුවෙන් පද්ධතියට ඇතුළත් නොකරන බව නිරීක්ෂණය වී තිබුණි.
ඇස්තමේන්තුගත ඖෂධ වර්ග මිලදී ගැනීම සඳහා මාස 11ක සැපයුම් කාලයක් සහිතව ඇණවුම් නිකුත් කිරීම ප්‍රතිපත්තිය වූ නමුත් ප්‍රසම්පාදන කාලසටහනකට අනුව කටයුතු කර නොතිබීමෙන් මාස 11න් වැඩි කාලයක් හෝ මාස 11කට වඩා වැඩි කාලයක් ප්‍රසම්පාදන කටයුතු සඳහා වැය කර තිබූ බවද සඳහන්ය.
2020 හා 2021 වර්ෂවලදී වෛද්‍ය සැපයීම් අංශය විසින් නිකුත් කර තිබුණු ඇතැම් ඇණවුම්වල ප්‍රසම්පාදන කටයුතු අවසන් කිරීම සඳහා මාස 12ත් මාස 27ත් අතර කාලයක් ගත වී තිබුණි
ජීවිතාරක්ෂක ඖෂධයක් වන Meropenem 1g එක් එන්නතක් රු.481කට මිලට ගැනීමට හැකියාව තිබුණද ප්‍රසම්පාදන කටයුතුවල ප්‍රමාදය හේතුවෙන් 2021 වසරේ රජයේ රෝහල් විසින් එක් ඒකකයක් රුපියල් 1956ත් – 4697ත් අතර විවිධ වූ මිල ගණන් යටතේ රුපියල් මිලියන 49.52ක් වැය කර දේශීය වෙළෙඳපොළෙන් ඉහළ මිලකට ගෙන ඇති බව මෙම වාර්තාවෙන් අනාවරණ කරයි.
