පූර්ව කොමිෂන් සභා හා කමිටුවල තීරණ ඇගයීම සහ ඉදිරි ක්‍රියාමාර්ග ගැනීම පි‍ළිබඳ ජනාධිපති පරීක්ෂණ කොමිෂන් සභාවේ සාමාජිකයින් මඩකලපුව දිස්ත්‍රික්කයේ අතුරුදන්වූවන්ගේ ඥාතීන් හමුවීමට නියමිතව තිබේ.
ඒ අනුව මඩකලපුව දිස්ත්‍රික් ලේකම් කාර්යාලයේ දී ලබන 21 වනදා සිට 23 වනදා දක්වා එම හමුව පැවැත්වීමට නියමිත බව ජනාධිපති කොමිසමේ ප්‍රකාශකයෙකු පැවසුවේය.
මඩකලපුව දිස්ත්‍රික්කයේ යුද සමයේ අතුරුදන්වූවන්ගේ පවුල්වල ඥාතීන් හමුවී මීට පෙර පැවති කොමිෂන් සභා සහ කමිටු මඟින් ඔවුන්ගේ ගැටලුවලට ලැබුණු විසඳුම් සම්බන්ධයෙන් සාකච්ඡා කිරීම එහි අරමුණ වී තිබේ.
මීට පෙර එම ජනාධිපති කොමිසමේ සාමාජිකයින් උතුරු පළාතේ අතුරුදන්වූවන් සමග සාකච්ඡා පැවැත්වූ අතර නුදුරේදීම මුලතිව් දිස්ත්‍රික්කයේ අතුරුදන් වූවන්ගේ ඥාතීන් සමග සාකච්ඡා පැවැත්වීමට නියමිතය.
මේ අතර මෙරට දකුණු අප්‍රිකානු තානාපතිවරයා පූර්ව කොමිෂන් සභා හා කමිටුවල තීරණ ඇගයීම සහ ඉදිරි ක්‍රියාමාර්ග ගැනීම පි‍ළිබඳව ජනාධිපති පරීක්ෂණ කොමිෂන් සභාව හමුවේ පෙනී සිටීමට නියමිතව තිබේ.
ඒ අනුව ලබන 12 වනදා දකුණු අප්‍රිකානු තානාපතිවරයා කොමිසම හමුවට පැමිණීමට නියමිත බව වාර්තා වේ.
මෙරට අතුරුදන්වූවන්, මානව හිමිකම් උල්ලං‍ඝනය වීම්, දකුණු අප්‍රිකාවේ නීති පද්ධතිය, එරට අතුරුදන්වූවන් සම්බන්ධයෙන් ඔවුන් ගනු ලැබු ක්‍රියාමාර්ග සම්බන්ධයෙන් තානාපතිවරයා ජනාධිපති කොමිසම හමුවේ ප්‍රකා‍ශ ලබාදීමට නියමිතව තිබේ.
