ත්රිකුණාමලයේ වරාය සේවකයෝ අකුරට වැඩ
කොළඹ වරාය සේවකයින් ආරම්භ කර ඇති අකුරට වැඩ කිරිමේ වෘත්තිය සමිති ක්රියාමාර්ගයට සහය පළ කිරීම සඳහා ත්රිකුණාමල වරාය සේවකයින් ද වෘත්තිය සමිති ක්රියාමාර්ගයක් ආරම්භ කර තිබේ.
ඒ පිළිබඳව පැහැදිලි කරන ත්රිකුණාමලය වරායේ ශ්රී ලංකා නිදහස් සේවක සංගමයේ සභාපති එච්.එම්.ඒ හේරත් මහතා පවසා සිටියේ, හෙට දිනයේ දී උද්ඝෝෂණයක් පැවැත්වීමට නියමිත බවය.
මේ පිළිබඳ වැඩිදුරටත් අදහස් දැක්වු ඒ මහතා,
“මව් සංගම් වෘත්තීය සමිති ඒකාබද්ධ වෙලා දැනට කොළඹ වරාය හා ගාලු වරාය තුළ මේ වන විට අකුරට වැඩ කිරීමේ ව්යාපාරයක් කරගෙන යනවා. ඒකට සහයෝගයක් දැක්වීමක් වශයෙන් ත්රිකුණාමලය වෘත්තීය සමිති ඒකාබද්ධ වෙලා, වෘත්තීය සමිතියක් පිහිටුවාගෙන දැනට අකුරට වැඩ කිරීමේ ව්යාපෘතියක් කරගෙන යනවා. එයට අමතරව හෙට දින දහවල් 12 සිට ප.ව 1 දක්වා උද්ඝෝෂණයක් ත්රිකුණාමලය වරාය ඉදිරිපිට ආරම්භ කිරීමට කටයුතු කරගෙන යනවා.“
මේ අතර, කොළඹ වරායේ නැගෙනහිර පර්යන්තය සම්බන්ධයෙන් මතුව ඇති ගැටලුව පිළිබඳව සාකච්ඡා කිරීම සඳහා අග්රාමාත්ය මහින්ද රාජපක්ෂ මහතා වරාය වෘත්තිය සමිතිවලට කැඳවිමක් සිදුකර තිබේ.
හෙට (01) දිනයේ අදාළ සාකච්ඡාව පැවැත්වෙන බව වරාය ශ්රී ලංකා නිදහස් සේවක සංගමයේ සභාපති ප්රසන්න කළුතරගේ මහතා සඳහන් කළේය.
