මැගසින් බන්ධනාගාරයේ දී පාර්ලිමේන්තු මන්ත්‍රී රිෂාඩ් බදියුදීන් මහතා ඇති කරගත් බව කියන සිද්ධිය බන්ධනාගාර විනිශ්චය සභාවක් හමුවේ කැඳවීමට තීරණය වී තිබේ.
පාර්ලිමේන්තු මන්ත්‍රී රිෂාඩ් බදියුදීන් මහතා විසින් කොළඹ මැගසින් බන්ධනාගාරයේදී වෛද්‍යවරයෙකුට අපහාස කිරීම,මරණ තර්ජන එල්ල කිරීම සහ රාජකාරියට බාධා කිරීම සම්බන්ධයෙන් මූලික පරීක්ෂණයක් බන්ධනාගාර සහකාර අධිකාරීවරයෙකු යටතේ සිදු කරන ලද බව බන්ධනාගාර කොමසාරිස් (පාලන), මාධ්‍ය ප්‍රකාශක චන්දන ඒකනායක මහතා පැවසීය.
එහි සඳහන් කරනු අනුව මෙම සිද්ධිය සම්බන්ධව බන්ධනාගාර විනිශ්චය සභාවක් හමුවට ඉදිරිපත් කිරීමට බලාපොරොත්තු වන බවයි ඔහු සඳහන් කළේ.
බන්ධනාගාර ආඥා පනතේ 87/1 වගන්තිය යටතේ බන්ධනාගාරය තුළදී යම් වරදක් සිදු කළ අයෙකුට බන්ධනාගාර විනිශ්චය සභාවක් ඉදිරියට පැමිණවීමට බලය පවතින බවද මාධ්‍ය ප්‍රකාශක චන්දන ඒකනායක මහතා පවසයි.
මහෙස්ත්‍රාත්වරයෙකුගේ මූලිකත්වයෙන් එහි නඩු කටයුතු මෙහෙයවනු ලබන බවත් ඉදිරියේදී මෙම සිද්ධියට අදාළව ස්වාධීන තීරණයක් ගැනීම සිදුවෙන බවත් ඔහු වැඩිදුරටත් සඳහන් කළේය.
