ශ්‍රී ලංකාවේ සත්කාරකත්වයෙන් පැවැත්වෙන “බහු ආංශික තාක්ෂණික සහ ආර්ථික සහයෝගීතාව සඳහා වන බෙංගාලබොක්ක ආශ්‍රිත රටවල සමුළුව” හෙවත් බිම්ස්ටෙක් රාජ්‍ය නායක සමුළුවේ අවසන් දිනය අදයි.
වීඩියෝ තාක්ෂණය ඔස්සේ පැවැත්වෙන එම සමුළුව පසුගිය 28 වනදා ආරම්භ වුණි.
5 වන වරට පැවැත්වෙන මෙවර බිම්ස්ටෙක් සමුළුවේ මුලසුන ජනාධිපති ගෝඨාභය රාජපක්ෂ මහතා හොඹවන අතර බංග්ලාදේශය, භූතානය, ඉන්දියාව, නේපාලය සහ තායිලන්තය යන සාමාජික රටවල රාජ්‍ය නායකයින් වීඩියෝ තාක්ෂණය ඔස්සේ ඊට සහභාගී වේ.
ඊයේ (29) සහ පෙරේදා (30) යන දිනවල බිම්ස්ටෙක් ජ්‍යෙෂ්ඨ නිලධාරීන්ගේ රැස්වීම පැවැත්වුණි.
විදේශ අමාත්‍යවරුන්ගේ රැස්වීම ද මීට සමගාමීව ඊයේ පැවැත්වුණි.
එම සමුළුව අතරතුර බිම්ස්ටෙක් සංවිධානයේ ප්‍රගතිය පිළිබඳව කලාපීය කණ්ඩායමක් ලෙස සාකච්ඡා සිදු වූ අතර බිම්ස්ටෙක් ප්‍රඥප්තිය සම්මත කර ගැනීමට සහ නීතිමය ගිවිසුම් කිහිපයකට අත්සන් තැබීම ද සිදුව ඇති බව සඳහන්ය.
