රාජ්ය වෙසක් උත්සවය යාපනය අර්ධද්වීපයේ පැවැත්වීමට අවශ්ය මූලික කටයුතු සූදානම් කෙරෙන බව යුද හමුදාපති ජෙනරාල් ශවේන්ද්ර සිල්වා මහතා පවසයි.
මහනුවර ප්රදේශයේදී මාධ්ය වෙත අදහස් දක්වමින් යුද හමුදාපතිවරයා මේ බව සඳහන් කළේය.
මෙහිදී වැඩිදුරටත් අදහස් දක්වමින් යුද හමුදාපතිවරයා සඳහන් කර සිටියේ, රාජ්ය වෙසක් උත්සවයට සමගාමීව සෙසු පළාත්වල ද වෙසක් උත්සව පවත්වන බවය.
කෙසේවෙතත් ඒ සඳහා තවත් කාලය ඇති බවත් අලුත් අවුරුදු සමය ගත කළ කාලයේ ප්රතිඵල මැයි මස මුල් කාලයේ දී ලැබෙනු ඇතැයි ද යුද හමුදාපතිවරයා මෙහිදී කියාසිටියේය.
“කෙසේවෙතත් අලුත් අවුරුදු සමයේ දී මේක කළමනාකරණය කර ගත හැකි නම් වෙසක් සමරන්න ගිය වරට වැඩිය හැකියාව ලැබෙයි. එසේ නොමැති වුණොත් එකේ අනෙක් පැත්තත් වෙන්න පුළුවන්. සිංහල, දෙමළ අවුරුද්ද ඉතාමත් හොඳින් සමරන්න. ඔබේ පවුල සමඟ සමරන්න. ඔබ අවුරුදු උත්සව පවත්වනවා නම් ගමට පමණක් සීමා කරන්න. සෞඛ්ය පුරුදුවලට අනුගතවෙමින් කටයුතු කරලා රටෙන් කොවිඩ් තුරන් කිරීමට සහයෝගය දක්වන්න.“
