රජයේ මූලික අරමුණ සුරක්ෂිත රටක් බිහි කිරීමයි – ජනපති
සියලු පුරවැසියන්ට බියෙන් හා සැකයෙන් තොරව ජීවත්විය හැකි සුරක්ෂිත පරිසරයක් සහතික කිරීම තම රජයේ මූලික අරමුණ බව ජනාධිපති ගෝඨාභය රාජපක්ෂ මහතා පවසයි.
ජනාධිපතිවරයා මේ බව සඳහන් කළේ කටුනායක ගුවන් හමුදා මූලික කඳවුරේ අද (05) පැවති ජනාධිපති වර්ණ ප්රදානෝත්සවයේදීය.
ජාතිය වෙනුවෙන් කළ විශිෂ්ට සේවය අගයමින් ශ්රී ලංකා ගුවන් හමුදාවේ බලඝන දෙකකට ජනාධිපති වර්ණ ප්රදානය කිරීම අද සිදුකෙරුණි.
ඒ ගුවන් හමුදාවේ අංක 05 ප්රහාරක ගුවන් බලඝනය සහ අංක 06 ප්රවාහන හෙලිකොප්ටර් යානා බලඝනය වෙතය.
වර්ණ ප්රදානයෙන් පසු කටුනායක මූලික ගුවන් කඳවුරේ සී 130 ගුවන් බලඝන දෙකක්ද ජනාධිපතිවරයාගේ නිරීක්ෂණයට ලක්වුණි.
ගුවන් හමුදාපති එයාර් මාර්ෂල් සුදර්ශන පතිරණ මහතා මෙහිදී ජනාධිපතිවරයා වෙත සමරු තිළිණයක් ද පිළිගැන්විය.
“ජීවිත පුද කළ සෑම ගුවන් හමුදා සාමාජිකයකුටම ජාතිය වෙනුවෙන් ගෞරවාචාරය පිරිනමනවා. අපේ ප්රතිපත්ති මාලාව ජනතාවට ඉදිරිපත් කළ විට ජාතික ආරක්ෂාව අතිශයින් වැදගත් බව පෙන්වා දුන්නා. එදිනෙදා වැඩකටයුතු හරියාකාරව කළ හැක්කේ රට තුළ ආරක්ෂාකාරී වාතාවරණයක් තිබුණොත් පමණයි. නොඑසේ නම් ආයෝජකයින් පවා රටට එන්නෙ නැහැ. ඒ නිසයි ජාතික ආරක්ෂාවට අපි මූලිකත්වය දෙන්නෙ. සෑම පුරවැසියෙකුටම බියෙන් සැකෙන් තොරව ජීවත්විය හැකි සුරක්ෂිත පරිසරයක් – ආරක්ෂිත රටක් ගොඩනඟා දීම අප ප්රතිපත්ති මාලාවේ මූලික හරයයි,” යනුවෙන් ජනාධිපතිවරයා සඳහන් කළේය.
