රාජ්‍ය නිලධාරීන්ට බධාවකින් තොරව සේවයට වාර්තා කිරීමට හැකිවන පරිදි අන්තර් පළාත් පොදු ප්‍රවාහන සේවා අද (02) සිට ආරම්භ කර තිබේ.
ප්‍රවාහන රාජ්‍ය අමාත්‍ය දිලුම් අමුණුගම මහතා පැවසුවේ ඒ අනුව පළාත් අතර බස් සහ දුම්රිය කිහිපයක් ධාවනයට එක්කර ඇති බවය.
රැකියා සඳහා යෑමට පමණක් මෙම අන්තර් පළාත් අතර ප්‍රවාහන සේවා ක්‍රියාත්මක වන බව දිලුම් අමුණුගම රාජ්‍ය අමාත්‍යවරයා පැවසුවේ.
“රාජ්‍ය අංශයේ සහ පෞද්ගලික අංශයේ රාජකාරී සඳහා යන අයට තමයි මේ ප්‍රවාහන පහසුකම් සැපයෙන්නේ. ඒ අනුව තම තමන්ගේ පෞද්ගලික කටයුතු සඳහා යන අය මේ ප්‍රවාහන සේවය භාවිත කිරීම සුදුසු නෑ. මාර්ග බාධකවලදී පරීක්ෂා කිරීම් සිදුවෙනවා. ඒ නිසා රාජකාරී හැඳුනුම්පත හෝ සේවයට කැඳවීමේ ලිපිය ඒ අය සතුව තිබිය යුතු වෙනවා.”
මේ අතර සෞඛ්‍ය සේවා අධ්‍යක්ෂ ජනරාල්, වෛද්‍ය අසේල ගුණවර්ධන මහතා සඳහන් කළේ අන්තර් පළාත් සංචරණ සීමා ලිහිල් කිරීමට මෙතෙක් කිසිදු තීරණයක් ගෙන නොමැති බවය.
සියලුම රාජ්‍ය සේවකයින් අද (02) සිට සාමාන්‍ය පරිදි රාජකාරි කටයුතු සඳහා කැඳවා තිබේ.
ඒ අනුව, කොවිඩ් -19 ව්‍යාප්තිය පාලනය කිරීමේ පහසුව සඳහා සීමිත කාර්යමණ්ඩල පිරිසක් කාර්යාල වෙත කැඳවමින් සහ නිවසේ සිට රාජකාරී කිරීමට අදාළව නිකුත් කරඇති සියලු චක්‍රලේඛ අවලංගු වන බව රාජ්‍ය සේවා, පළාත් සභා හා පළාත් පාලන අමාත්‍යංශය සඳහන් කළේය.
අද සිට රාජ්‍ය සේවය සාමාන්‍ය පරිදි පවත්වාගෙන යෑමට අදාළ චක්‍රලේඛය ද පසුගිය 30 වනදා නිකුත් කෙරුණි.
එන්නත්කරණයට ලක්විය යුතු බහුතරයක් එන්නත්කරණය කිරීමේ කටයුතු අවසන් වෙමින් පැවතීම හා රාජ්‍ය නිලධාරීන් බහුතරයක් එන්නත්කරණයට ලක්කර ඇති බැවින් රජයේ කාර්යයන් සාමාන්‍ය පරිදි පවත්වාගෙන යෑමට ප්‍රමුඛත්වය ලබාදිය යුතු බව එහි සඳහන්ය.
කෙසේවුවද රාජ්‍ය සේවය සාමාන්‍ය පරිදි පවත්වාගෙන යෑමේදී රජයේ නිලධාරීන් හා මහජනතාව දුරස්ථභාවය ආරක්ෂා කිරීම, මුඛ ආවරණ පැළඳීම හා දෑත් පිරිසිදු කිරීම වැනි සෞඛ්‍ය මාර්ගෝපදේශ අනුගමනය කළ යුතුවේ.
ආයතනික කාර්යමණ්ඩලය මෙන්ම සේවාලාභීන් ද කොවිඩ් වෛරසය ආසාදනයවීමෙන් වළක්වාගනිමින් සේවා සැපයීමේ වගකීම ආයතන ප්‍රධානියා වෙත පවරා ඇති බවද රාජ්‍ය සේවා, පළාත් සභා හා පළාත් පාලන අමාත්‍යංශය පවසයි.
මේ අතර දිවයින පුරා සියලු ගුරුවරුන් සහ විදුහල්පතිවරුන්ද අද සිය රාජකාරී සඳහා වාර්තා කළ යුතුය.
