සුවසැරිය ට ප්‍රහාරයක්
හැටන් ප්‍රදේශයේ 1990 සුව සැරිය ගිලන්රථ රියදුරෙකුට සහ එහි සේවිකාවකට පහරදීමක් සිදුකර ඇතැයි වාර්තා වේ.
එම පහරදීම සම්බන්ධයෙන් මේ වන විට සැකකරුවන් දෙදෙනෙක් අත්අඩංගුවට ගත් බව දිඹුල පතන පොලීසිය පවසයි.
කුඩාගම, ආගිල් ප්‍රදේශයේ ඉදිකෙරෙමින් පවතින සංචාරක නිකේතනයක සේවකයෙක් “බැල්කනියෙන්” බිමට වැටී ඇතැයි අද (22) අලුයම 2ට පමණ 1990 ගිලන්රථ සේවයට දුරකථන ඇමතුමක් ලැබී තිබේ.
ඒ අනුව ගිලන්රථය අදාළ ස්ථානයට ගොස් ඇති අතර, බිමට වැටුණේයැයි පැවසෙන සේවකයාට කිසිදු තුවාලයක් හෝ එවැනි සිදුවීමක් පිළිබඳ කරුණු අනාවරණය නොවීම හේතුවෙන් ගිලන්රථ රියදුරු හා එහි සේවිකාව විසින් අදාළ සේවකයා රෝහල්ගත කිරීමට අවශ්‍ය නොවන බව සඳහන් කර ඇත.
එහිදී අදාළ සේවකයා අසල බීමතින් සිටි පිරිසක් ගිලන්රථ රියදුරු ට, එහි සේවිකාවට හා ගිලන්රථයට පහර දී ඇතැයි දිඹුල පතන පොලීසිය සඳහන් කරයි.
සිදුවීම සැල වු වහාම පොලිස් නිලධාරීන් අදාළ ස්ථානයට ගොස් සැකකරුවන් අත්අඩංගුවට ගෙන තිබේ.
ඔවුන් අධික ලෙස බීමතින් සිටි නිසාවෙන් කොටගල ප්‍රාදේශීය රෝහලේ වෛද්‍යවරයා වෙත ඉදිරිපත් කර වාර්තාවක් ලබාගෙන සැකකරුවන් හැටන් මහෙස්ත්‍රාත් අධිකරණය වෙත ඉදිරිපත් කරන බව ද පොලීසිය පවසයි.
