සේවක නවාතැන් සදහා අවශ්‍ය කොවිඩ් ආරක්ෂිත නිර්ණායකයන් ලබා දෙන්න ආයෝජන මණ්ඩලයේ අධ්‍යක්ෂ ජනරාල් සංජය මොහොට්ටාල
කර්මාන්ත ශාලාවල සේවය කරන සේවක සේවිකාවන් නවාතැන් ගෙන සිටින නේවාසිකාගාර සදහා කොවිඩ් 19 ආරක්ෂිත ක්‍රමවේද ඇතුලත් නිර්ණායකයන් ලබා දෙන ලෙස සෞඛ්‍ය අමාත්‍යාංශයෙන් ඉල්ලා සිටි බව ශ්‍රී ලංකා ආයෝජන මණ්ඩලයේ අධ්‍යක්ෂ ජනරාල් සංජය මොහොට්ටාල මහතා පවසයි.
මේ වනවිට නිෂ්පාදන ක්‍රියාවලියට එක් වී ඇති කර්මාන්ත ශාලා සියල්ලම සෞඛ්‍ය අමාත්‍යාංශයේ නිර්දේශ හා මාර්ගෝපදේශයන් අනුව ක්‍රියාත්මක වේ. ප්‍රවාහනයේදී ද සෞඛ්‍ය ආරක්ෂිත ක්‍රමවේදයන් අනුගමනය කරයි. එලෙසම නවාතැන් ගන්නා ස්ථාන ද සෞඛ්‍ය ආරක්ෂිතව පවත්වාගෙන යාම අත්‍යාවශ්‍ය බව පෙනී යයි. එකම නවාතැන තුල විවිධ ආයතන තූල සේවය කරන පිරිස් නවාතැන් ගැනීම හේතුවෙන් වෛරසය ව්‍යාප්ත වීමේ අවධානය ඉහල යයි.
මෙම කරුණු හා මෙරට ආර්ථික ශක්තියට විශාල පිටුවහලක් ලබා දෙන මෙරට ශ්‍රමබලකායේ ජීවන තත්ත්වය උසස් කිරීමත් අරමුණු කරගනිමින් අදාල නිර්ණායකයන් කඩිනමින් ලබා දෙන තමා ඉල්ලා සිටි බව සංජය මොහොට්ටාල මහතා පවසයි
