හිටපු CID ප්රධානියාගේ FR පෙත්සම සලකා බැලීම මාර්තු
තමා අත්අඩංගුවට ගෙන රක්ෂිත බන්ධනාගාර ගත කිරීම නීතිවිරෝධී යැයි ප්රකාශ කරන මෙන් ඉල්ලා අපරාධ පරීක්ෂණ දෙපාර්තමේන්තුවේ හිටපු අධ්යක්ෂ ශානි අබේසේකර මහතා විසින් ඉදිරිපත් කළ මූලික අයිතිවාසිකම් පෙත්සම සලකා බැලීම මාර්තු මස 31දා කැඳවන ලෙස ශ්රේෂ්ඨාධිකරණය නියම කර තිබේ.
එම පෙත්සම අද(22) බුවනෙක අලුවිහාරේ, යසන්ත කෝදාගොඩ සහ ජනක් ද සිල්වා යන මහත්වරුන්ගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබීය.
එහිදී විනිසුරු මඩුල්ල නියම කළේ, පෙත්සම සලකා බැලීම සඳහා මාර්තු මස 31 දා කැඳවන බවය.
අදාළ පෙත්සමේ වගඋත්තරකරුවන් ලෙස පොලිස්පති සී.ඩී.වික්රමරත්න, කොළඹ අපරාධ කොට්ඨාසයේ අධ්යක්ෂක සහකාර පොලිස් අධිකාරී නෙවිල් සිල්වා, ඒම කොට්ඨාසයේ පොලිස් පරික්ෂක නිශාන්ත, ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් සහ නීතිපතිවරයා නම් කර තිබේ.
