රාජගිරිය රිය අනතුර සම්බන්ධයෙන් හිටපු අමාත්ය පාඨලි චම්පික රණවක මහතාට එරෙහිව නීතිපතිවරයා විසින් ගොනුකර ඇති නඩුවේ මූලික විරෝධතා ලිඛිතව ජුනි මස 30 වනදා ඉදිරිපත් කිරීමට පියවරගන්නා ලෙස කොළඹ මහාධිකරණය අද (27) ඔහුගේ නීතිඥවරුන්ට නියෝග කළේය.
2016 වසරේදී රාජගිරිය ප්රදේශයේදී අපරික්ෂාකාරී ලෙස රිය පදවා තරුණයකුට බරපතළ තුවාල සිදු කළේ යැයි ඔහුට චෝදනා එල්ල වී තිබේ.
එම නඩුව අද කොළඹ මහාධිකරණ විනිසුරු නාමල් බලල්ලේ මහතා ඉදිරියේ කැඳවනු ලැබීය.
එහිදී විත්තිකාර චම්පික රණවක මහතා වෙනුවෙන් පෙනී සිටි නීතිඥ රජික කොඩිතුවක්කු මහතා අධිකරණයට දන්වා සිටියේ එම නඩුවේ විත්තිය වෙනුවෙන් පෙනී සිටින ජනාධිපති නීතිඥ අනුජ ප්රේමරත්න මහතාගේ කණිෂ්ඨ නීතිඥවරයෙකු සහ නීතිඥවරියක් කොවිඩ් ආසාදනය වී සිටින හෙයින් ජනාධිපති නීතිඥ ප්රේමරත්න මහතා ද මේ වනවිට නිරෝධායනයට ලක්වී සිටින බවය.
මේ නිසා මෙම නඩුවට අදාළ මූලික විරෝධතා ඉදිරිපත් කිරීම සඳහා දිනයක් අයැද සිටින ලෙස ලෙස ජනාධිපති නීතිඥ අනුජ ප්රේමරත්න මහතා තමන්ට දන්වා ඇතැයිද නීතිඥවරයා පැවසීය.
මෙහිදී පැමිණිල්ල වෙනුවෙන් පෙනී සිටි නියෝජ්ය සොලිසිටර් ජනරාල් දිලීප පිරිස් මහතා අධිකරණයට දන්වා සිටියේ අධිකරණයේ කාලය ඉතිරිකර ගැනීම සඳහා මෙම නඩුවට අදාළ විත්තියේ මූලික විරෝධතා ලිඛිතව ඉදිරිපත් කිරීම සුදුසු බවය.
මෙහිදී විනිසුරු බලල්ලේ මහතා ද කියා සිටියේ විත්තියේ මූලික විරෝධතා ලිඛිතව ඉදිරිපත් කිරීම සුදුසු බවය.
