නිරෝධායන නීතිය උල්ලංඝනය කරමින් උද්ඝෝෂණය කළේ යැයි සැකපිට අත්අඩංගුවට ගත් පිටකොටුවේ වෙළෙඳුන් දෙදෙනෙකු ඇප මත මුදා හරින ලෙස කොළඹ මහෙස්ත්‍රාත් අධිකරණයේ නියෝග කර තිබේ.
මත්පැන් හල් විවෘත කර තිබියදී තමන්ට ද වෙළෙඳ කටයුතු කිරීමට අවසර දෙන්නැයි බලකරමින් කොටුව දුම්රියපොළ ඉදිරිපිට කොටුව පොලීසිය විසින් අත්අඩංගුවට ගත් එම සැකකරුවන් දෙදෙනා අද (20) කොළඹ මහෙස්ත්‍රාත් අධිකරණයට ඉදිරිපත් කර තිබුණි.
පොලිසිය අධිකරණය හමුවේ කරුණු දක්වමින් මත්පැන් හල් විවෘත කර තිබියදී තමන්ට ද ව්‍යාපාරික කටයුතුවල නිරත වීමට ඉඩ දෙන ලෙස බල කරමින් එම සැකකරුවන් ඇතුළු පිරිසක් කොළඹ කොටුව දුම්රියපොළ ඉදිරිපිට ඊයේ (19) උද්ඝෝෂණයක නිරත වූ බවය.
සෞඛ්‍ය නීති උල්ලංගනය කරමින් නිරෝධායන නීතියට පටහැනි ආකාරයට එම උද්ඝෝෂණය සිදුකළ බවත් එම සිද්ධියට සම්බන්ධ තවත් සැකකරුවන් පිරිසක් අත්අඩංගුවට ගැනීමට අවශ්‍යව තිබෙන හෙයින් එම සැකකරුවන් දෙදෙනා රක්ෂිත බන්ධනාගාර ගත කරන ලෙස පොලීසිය අධිකරණයෙන් ඉල්ලීමක් කළේය.
මෙහිදී සැකකරු වෙනුවෙන් පෙනී සිටි නීතිඥවරු අධිකරණය හමුවේ කරුණු දක්වමින් තම සේවාදායකයින් සෞඛ්‍යාරක්ෂිත ක්‍රමවේද අනුගමනය කරමින් නිරෝදායන නීතිය උල්ලංඝනය වුණා ආකාරයට උද්ඝෝෂණය පැවැත් වූ බව සඳහන් කර සිටියේය.
ඉදිරිපත් වූ කරුණු සලකා බැලූ මහෙස්ත්‍රාත්වරිය එම සැකකරුවන් දෙදෙනා රුපියල් 50,000 බැගින් වූ ශරීර ඇප දෙකක් මත මුදා හැරීමට නියම කළේය.
