මධ්‍යම කඳුකරයේ පවතින වැසි රහිත අධික වියළි කාලගුණය හේතුවෙන් මහවැලි ගඟ සිඳි ගොස් ඇති අයුරු දක්නට ලැබුණි.
තැන්නේකුඹුර පාලම අසලින් වෙනදා ට සුන්දරව ගලා යන මහවැලිය සේම ගඟේ පෝෂක ඇළ දොළ සහ අතු ගංඟාවන් ද සියල්ල සිඳී ගොස් ඇති බව අප වාර්තාකරු පැවසීය.
මේ අතර, ගාල්ල මාතර සහ රත්නපුර දිස්ත්‍රික්කවල සවස් කාලයේ වැසි ස්වල්පයක් ඇතිවිය හැකි බව කාලගුණ විද්‍යා දෙපාර්තමේන්තුව පවසයි.
ඉදිරි පැය 24 ට අදාළව නිවේදනයක් නිකුත් කරමින් එම දෙපාර්තමේන්තුව වැඩිදුරටත් පවසන්නේ ඊට අමතරව දිවයිනේ ප්‍රධාන වශයෙන් වැසි රහිත කාලගුණ තත්ත්වයක් පවතින බවය.
මේ අතර බස්නාහිර, සබරගමුව, මධ්‍යම, උතුරු මැද සහ වයඹ පළාත්වලත් ගාල්ල සහ මාතර දිස්ත්‍රික්කවලත් ඇතැම් ස්ථානවල උදෑසන කාලයේදී මීදුම් සහිත තත්ත්වයක් බලාපොරොත්තු විය හැකි බවද අදාළ නිවේදනයෙන් පෙන්වා දෙයි.
