කටුගස්තොට මැණික්කුඹුර ප්‍රදේශයේ නිවසක අද (24) පෙරවරුවේ හටගත් ගින්නකින් නිවසේ සිටි පියා, දියණිය සහ තරුණයෙකු පිළිස්සී මියගොස් තිබුණි.
අනතුරින් බරපතළ පිළිස්සුම් තුවාල ලැබූ මව රෝහල්ගත කෙරුණි.
මෙම නිවසේ ගින්න හටගෙන තිබුණේ අද පෙරවරු 06 ට පමණය.
එම අවස්ථාවේ මව, පියා සහ දියණිය නිවසේ රැඳී සිට ඇති අතර නිවසට පැමිණ සිටි තරුණයෙකු ද ගින්නට හසුව තිබුණි.
ගින්නෙන් පියා, දියණිය සහ අදාළ තරුණයා එම ස්ථානයේදීම මියගිය අතර මව බරපතළ පිළිස්සුම් තුවාල ලබා මහනුවර ජාතික රෝහලට ඇතුළත් කෙරුණි.
මහනුවර ගිනිනිවීමේ ඒකකය පැමිණ ගින්න නිවා දැමීමට පියවර ගත්තත් ඒ වනවිටත් නිවස සම්පූර්ණයෙන්ම විනාශ වී අවසන්ය.
මියගියේ 71 හැවිරිදි මුත්තතම්බි ඊස්වර දේවන්, 30 හැවිරිදි ඊස්වර දේවන් චන්ද්‍රවානි සහ බාබු නමැති තරුණයෙකි.
පොලීසිය පවසන්නේ, මියගිය ඊස්වර දේවන් චන්ද්‍රවානි සහ නිවසට පැමිණි බාබු නමැති තරුණයා අතර වසර 12ක පමණ ප්‍රේම සබඳතාවක් තිබී ඇති බවය.
එම සබඳතාව නැවැත්වීමට තරුණිය තීරණය කිරීමත් සමග වරින්වර ඔවුන් අතර ඇතිවූ ආරවුල් සම්බන්ධයෙන් පොලීසියට පැමිණිලි ද ඉදිරිපත් වී තිබුණි.
තුවාල ලබා රෝහල්ගතව සිටින මව පොලීසියට පවසා ඇත්තේ, සිය දියණිය වෙනත් විවාහයකට සූදානම්ව සිටි අතර ඒ බව දැනගත් තරුණයා ඊයේ පස්වරුවේ නිවසට පැමිණ තර්ජනය කළ බවය.
අනතුරුව කෑන් එකක් ද රැගෙන අද අලුයම නිවසට පැමිණි ඔහු, සිය දියණිය සහ සැමියා නිදා සිටි කාමරයට ගොස් ගිනි තබාගත් බව මව පොලීසියට පවසා තිබේ.
පොලීසිය පවසන්නේ, තරුණයා රැගෙනවිත් ඇත්තේ පෙට්‍රල් කෑන් එකක් බවට සැකකෙරෙන බවය.
සිද්ධිය සම්බන්ධයෙන් කටුගස්තොට පොලීසිය විශේෂ විමර්ශනයක් ආරම්භ කර තිබේ.
