QR ක්‍රමවේදය යටතේ ඉන්ධන ලබාදීම ඇරඹෙයි
QR ක්‍රමවේදය යටතේ ඉන්ධන ලබාදීම ඊයේ (31) මධ්‍යයම රාත්‍රීයේ සිට ආරම්භ කෙරුණි.
ඒ අනුව අද (01) දිනයේ සිට QR ක්‍රමවේදය සහ කෝටා යටතේ පමණක් දිවයින පුරා පිහිටි සියලු ඉන්ධන පිරවුම්හල්වලින් ඉන්ධන නිකුත් කිරීම සිදුකෙරේ.
ජාතික ඉන්ධන අවසර පත්‍රයට ඊයේ පස්වරුව වන විට රථ වාහන මිලියන 5කට ආසන්න සංඛ්‍යාවක් ලියාපදිංචි වී ඇති අතර මෙරට සමස්ත ඉන්ධන පිරවුම්හල් සංඛ්‍යාවෙන් සියයට 95ක් QR ක්‍රමවේදයට අනුගත වී ඇති බවද බලශක්ති අමාත්‍යංශය සඳහන් කළේය.
QR ක්‍රමවේදයට අනුගත වූ ඉන්ධන පිරවුම්හල් සඳහා ඉන්ධන බෙදාහැරීමට ප්‍රමුඛතාව හිමිවන අතර ඉන්ධන පිරවුම්හල් වෙත බෙදාහරින ලද ඉන්ධන තොගවලින් QR කේතය භාවිත කර ඉන්ධන නිකුත්කිරීම නිරීක්ෂණය කර එම බෙදාහැරීම ඉදිරියේදී සිදුකරනු ලබයි.
මේ අතර විදුලි ජනන යන්ත්‍ර, උද්‍යාන උපකරණ, යන්ත්‍රෝපකරණ, ඉන්ධන අවශ්‍ය අනෙකුත් උපකරණ භාවිත කරන පුද්ගලයින්ට අවශ්‍ය ඉන්ධන වර්ගය, සතිපතා ඉන්ධන අවශ්‍යතාවය සහ ඔවුන් ඉන්ධන ලබාගැනීමට බලාපොරොත්තු වන පිරවුම්හල තෝරාගෙන අදාළ ප්‍රාදේශීය ලේකම් කාර්යාලවල ලියාපදිංචි විය යුතු වේ.
එක් එක් පොලිස් ස්ථානය වෙනුවෙන් තෝරාගත් ඉන්ධන පිරවුම්හල්වලින් පොලිස් දෙපාර්තමේන්තුවට වෙන් කරන ලද කෝටාව ලබාදීමට කටයුතු කරන අතර ඉදිරියේදී එම පිරවුම්හල් වෙත ලබාදිය යුතු කෝටාව පිළිබඳ දැනුවත් කිරීමට නියමිතය.
එමෙන්ම නීතිවිරෝධී ලෙස ඉන්ධන තොග ගබඩා කිරීම, විකුණුම් කටයුතු හෝ ඉන්ධන ලබාදීමේදී උපදෙස් පිළිනොපදින පිරවුම්හල් සහ පුද්ගලයින් පිළිබඳව ඡායාරූප හෝ වීඩියෝ සාක්ෂි 074 21 23 123 යන වට්ස්ඇප් අංකය වෙත යොමු කිරීමට පියවර ගන්නා ලෙස ද විදුලිබල හා බලශක්ති අමාත්‍යාංශය දැනුම්දෙයි.
මේ අතර QR ක්‍රමවේදය ක්‍රියාත්මක කිරිමේ දී සිය ඉන්ධන පිරවුම්හල්වලට නැවත යුද හමුදා ආරක්ෂාව ලබාදෙන ලෙස ඛනිජ තෙල් බෙදුම්කරුවන්ගේ සංගමයේ උප සභාපති කුසුම් සන්දනායක මහතා ඉල්ලීමක් කරයි.
