පාසල් සිසුන් දෙදෙනෙකු පැහැරගැනීමට උත්සාහ කළ පිරිසක් කොටුකර ගැනීමට ගල්ගමුව ඇහැටුවැව පොලීසිය පසුගියදා සමත් ව තිබේ.
මෝටර් රථයකින් පැමිණි එම පිරිස එකම පවුලේ 15 සහ 17 යන වයස්වල පසුවන පාසල් දරුවන් දෙදෙනෙකු ඔවුන්ගේ නිවස ඉදිරිපිටදී පැහැරගෙන යාමට උත්සාහ කර ඇත.
17 හැවිරිදි සිසුවා ඔවුන්ගෙන් මිදී පළාගොස් ඇති අතර අනෙක් සිසුවාට පහර දී අතරමඟ දමාගොස් තිබේ.
සැකකරුවන්ගේ ඉලක්කය වී ඇත්තේ පළාගිය සිසුවා බව ට අනාවරණය වී ඇත.
අතරමඟ දමා ගොස් සිටි දරුවා තමා මුහුණදුන් බියකරු අත්දැකීම මෙලෙස විස්තර කළේය.
“එදා අපි කඩේ යද්දි වාහනයක් නවත්තලා තියෙනවා. අයියට එන්න කියලා කත කරලා තියෙනවා. පෙට්‍රල් විකුණනවා ද කියලා අහලා තියෙනවා පොලීසියෙන් වගේ. අයියාව වාහනේ දාගෙන ගෙදරට ඇවිත් තියෙනවා. අයියා ලව්වා මට කෝල් කරා. අයියා කෝල් කර විදිය වෙනස් නිසා මම ඇහුවා කවුද ළඟ ඉන්නේ ඇයි ඔහොම කතා කරන්නේ කියලා. මම ඉස්සරහට ආවා. එද්දි තුන්දෙනෙක් බැහැලා ආවා මාව අල්ල ගන්න. මාව ඇදගෙන ගියා පෙට්‍රල් විකුණනවා ද කියලා අහලා. අයියා බැහැ ගත්තා. මාව වාහනේ ඇතුළට දා ගත්තා. නැග්ගට පස්සේ ගැහුවා චණ්ඩියෙක් ද කියලා. මම මීට කිලින් ඒ අයව දැකලා නෑ. කිලෝ මීටර් 2ක් වගේ එක්කන් ගියා. ගිහින් මඟ දාලා ගියා.”
මෝටර් රථය ආපසු පැමිණෙන අවස්ථාවේ ඇහැටුවැව මුර සංචාරයේ නිරත පොලිස් නිලධාරීන් වාහනය නවත්වා තොරතුරු විමසීමේදී ඇතිවූ සැකය සහ සිසුන්ගේ මව්පියන්ගෙන් ලද පැමිණිල්ල මත රථයේ සිටි පුද්ගලයින් තිදෙනා අත්අඩංගුවට ගෙන ඇත.
පසුව එම සැකකරුවන් තිදෙනා ගල්ගමුව මහෙස්ත්‍රාත්වරයා විසින් අගෝස්තු 4 දක්වා රක්ෂිත බන්ධනාගාරගත කෙරුණි.
