කෘෂිකර්මාන්තයේ නිරත ගොවීන්ට දිනෙන් දින එල්ල වන බලපෑම් සහ තර්ජන හමුවේ සිය අස්වනු සඳහා සාධාරණ මිලක් නොලැබීම හේතුවෙන් ගොවිතැනින් ඈත්වීමට සිදුව ඇති බව පවසමින් අම්බලන්තොට නගරයේදී අද (10) පැවති ගොවි විරෝධතාවක් අතරතුර උණුසුම් තත්ත්වයක් හටගෙන තිබුණි.
අම්බලන්තොට රිදියගම ඒකාබද්ධ ගොවි සංවිධානය විසින් සංවිධානය කළ මෙම විරෝධතාව සඳහා කිරිඳිඔය ඒකාබද්ධ ගොවි සංවිධානය, වම් ඉවුර, දකුණු ඉවුර ඇතුළු ගොවි සංවිධාන රැසක නියෝජිතයෝ එක්ව සිටියහ.
අම්බලන්තොට බස් නැවතුම්පොළ අසලට රැස් වූ ගොවීහු විරෝධතා පුවරු ප්රදර්ශනය කරමින් සහ සටන් පාඨ කියමින් සිය ඉල්ලීම් ඉදිරිපත් කළහ.
අනතුරුව ඔවුහු අම්බලන්තොට නගරය හරහා වලවේ ගඟ පාලම අසලට ගමන් කර, පසුව නැවත නගර මධ්යයේ ඔරලෝසු කණුව දක්වා පැමිණ විරෝධතාවයේ නිරත වූහ.
වී සඳහා සාධාරණ මිලක් ලබාදීම, කෘෂිකර්මාන්තයට අවශ්ය යෙදවුම්වල මිල අඩු කිරීම සහ ගොවීන්ට විවිධ නම්වලින් අපහාස කිරීම නතර කිරීම ඇතුළු ඉල්ලීම් රැසක් මුල්කර ගනිමින් මෙම විරෝධතාව පැවැති බව වාර්තාවේ.
එමෙන්ම, නිෂ්පාදන වියදමට සරිලන පරිදි වී කිලෝග්රෑමයක් රුපියල් 140ක මිලකට හෝ රජය විසින් මිලදී ගන්නා ලෙසද ගොවීහු ඉල්ලා සිටියහ.
විරෝධතාව හේතුවෙන් ප්රධාන මාර්ගයේ රථවාහන ගමනාගමනයට තරමක බාධා එල්ල වූ අතර, අම්බලන්තොට පොලිස් රථවාහන අංශයේ නිලධාරීන්ගේ මැදිහත්වීමෙන් විරෝධතාකරුවන් මාර්ගයෙන් පසෙකට වී විරෝධතාවයේ නිරත වූහ.
මේ අතර, ගොවි සංවිධාන නියෝජිතයින් මාධ්ය වෙත අදහස් දක්වමින් සිටියදී එම ස්ථානයට පැමිණි පුද්ගලයෙකු ගොවීන් සමඟ බහින්බස්වීමක් ඇති කරගෙන ඔවුන්ගේ අදහස් දැක්වීමට බාධා කිරීමත් සමඟ උණුසුම් තත්ත්වයක් හටගෙන තිබේ.
පසුව එම බහින්බස්වීම දුරදිග යාමෙන් තල්ලු කිරීම් ඇතුළු සිදුවීම් ඇති වූ අතර, පහරදීමක්ද සිදුවූ බව ගොවි සංවිධාන නියෝජිතයෝ සඳහන් කළහ.
අදාළ ගැටුමට සම්බන්ධ වූ පුද්ගලයා අනතුරුව අම්බලන්තොට රෝහල් මාර්ගය දෙසට දිව ගොස් ඇති අතර, එම ස්ථානයට පැමිණි පොලීසිය මැදිහත්වී තත්ත්වය පාලනය කර තිබේ.
