එජාප නව නායකයා පිළිබඳ අවසන් තීරණය ලබන බදාදා
විසිපස් වසරකට පසු රනිල් වික්‍රමසිංහ මහතා එක්සත් ජාතික පක්ෂයේ නායකත්වයෙන් ඉවත්වීමට තීරණය කර තිබේ.
පක්ෂ මූලස්ථානයේදී අද (10) පැවති සාකච්ඡාවක දී වික්‍රමසිංහ මහතා මෙම තීරණය දැනුම් දී ඇත.
පක්ෂ මහ ලේකම් අකිල විරාජ් කාරියවසම් මහතා ප්‍රකාශ කළේ නව නායකත්වයට සිව්දෙනෙකු නම් යෝජනා වී ඇති අතර ඒ පිළිබඳ අවසන් තීරණය ලබන බදාදා ප්‍රකාශයට පත් කරන බවය.
එක්සත් ජාතික පක්ෂයේ හිටපු පාර්ලිමේන්තු මන්ත්‍රි කණ්ඩායම සහ පක්ෂයේ නිලධාරී මඩුල්ල අද පෙරවරුවේ සිරිකොත දී රැස්වුයේ පක්ෂ නායක රනිල් වික්‍රමසිංහ මහතාගේ ප්‍රධානත්වයෙනි.
එහිදී වික්‍රමසිංහ මහතා ප්‍රකාශ කර ඇත්තේ තමා පක්ෂ නායකත්වයෙන් ඉවත් වන බවය.
එළැඹෙන බදාදා නව නායකයෙක් පත් කරන බව ද ඔහු පවසා තිබේ.
නායකත්වය බාරගැනීමට සුදානම් අය සිටීනම් ඉදිරිපත් වන්නැයි, රනිල් වික්‍රමසිංහ මහතා අද සාකච්ඡාවට සහභාගි වූ හිටපු මන්ත්‍රීවරුන්ට පවසා තිබේ.
එම අවස්ථාවේදී පක්ෂ මහලේකම් අකිල විරාජ් කාරියවසම්, උප නායක රවී කරුණානායක, වජිර අබේවර්ධන සහ දයා ගමගේ යන මහත්වරුන් නායකත්වය ලබාගැනීම සඳහා ඉදිරිපත් වී තිබේ.
එම පිරිස අතරින් අයෙකු පක්ෂයේ ඒකමතික තීරණයෙන් එළැඹෙන බදාදා පක්ෂ නායකත්වයට නම් කෙරෙනු ඇත.
