අතුරුදන් යැයි පැවසෙන අපේ ජන බල පක්ෂයේ ලේකම් හිමි කෑගල්ලේ ?
අතුරුදන්ව ඇතැයි පැවසෙන අපේ ජන බල පක්ෂයේ මහ ලේකම්, පූජ්‍ය වේදිනිගම විමලතිස්ස හිමියන් මාවනැල්ල උතුවන්කන්ද ප්‍රදේශයේ නිවසකට වැඩම කර ඇති බවට වාර්තා විය.
එම තොරතුර මත “අද දෙරණ“ ප්‍රාදේශීය වාර්තාකරු එම ස්ථානයට ඊයේ (10) රාත්‍රියේ ගොස් ඇති අතර, නමුත් උන්වහන්සේ එම ස්ථානයේ නොසිටි බව අනාවරණය වුයේය.
අපේ ජනබල පක්ෂයේ කෑගල්ල දිස්ත්‍රික්කයේ ලේකම් හා එහි අපේක්ෂකයෙකු ද වූ ඒ.ඩී.වසන්ත මහතාට අයත් නිවසට උන්වහන්සේ වැඩම කර සිටි බව මෙහිදී අනාවරණ විය.
මෙහිදී අදහස් දක්වමින් වසන්ත මහතා පවසා සිටියේ, වේදිනිගම හිමියන් එම ස්ථානයට වැඩම කළ බවය.
ස්වාමින් වහන්සේ කලබලයෙන් එම ස්ථානයට පැමිණි බවත්, තමාට තර්ජනයක් ඇති බවක් පැවසු බවත් ඒ.ඩී.වසන්ත මහතා කියා සිටියේය.
“හාමුදුරුවෝ පස්සේ ජිප් එකකින් පන්නනවා කිව්වා. දෙපාරක් තුන්පාරක් පිරිසක් ඇවිත් හාමුදුරුවෝ අල්ල ගන්න උත්සහ කරලා තියෙනවා. හාමුදුරුවෝ බලෙන් පැනලා ඇවිත් තමා මගේ ළඟට ආවේ.“
“උදේ 8.30ට විතර හාමුදුරුවෝ ආවා. ඊට පස්සේ 119 ගැහුවා කියලා පොලීසියෙන් ඇවිත් ගෙදර පරීක්ෂා කරා. ඒ වෙලාවේ හාමුදුරුවෝ හිටියේ නැහැ. හාමුදුරුවෝ එන්න කලින් පොලීසිය ගෙදර ඉස්සරහා හිටියේ නමුත් හාමුදුරුවෝ අල්ල ගත්තේ නැ ඒ වෙලාවේ…“
“හාමුදුරුවන් පිටත් වුණා මෙතෙන ආරක්ෂාවක් නෑ කියන පදනමෙන්. යම්කිසි විදියකින් බලගතු කෙනෙක් මේ ප්‍රශ්නය විසඳා ගන්න මැදිහත් වෙනවා නම් මට මැදිහත් වෙන්න පුළුවන්. ඕන වෙලාවක හාමුදුරුවෝ එක්ක කථා කරන්න පුළුවන්. කවුරුහරි, හාමුදුරුවන්ගේ ආරක්ෂාව තහවුරු කරනවා නම්… “ යනුවෙන් ද ඒ මහතා වැඩිදුරටත් පැවසීය.
මෙවර මහ මැතිවරණයට ඉදිරිපත් වූ අපේ ජන බල පක්ෂයට මැතිවරණ ප්‍රතිඵල අනුව එක් ජාතික ලැයිස්තු මන්ත්‍රී ධූරයක් හිමිව තිබේ. පසුව ඒ සඳහා පූජ්‍ය ගලගොඩඅත්තේ ඥානසාර හිමියන්ගේ නම යෝජනා විණි.
නමුත් පක්ෂයට හිමි වූ ජාතික ලැයිස්තු මන්ත්‍රී ධුරය සම්බන්ධයෙන් අර්බුදකාරී තත්ත්වයක් මතුවුයේ එම පක්ෂයේ මහ ලේකම් පූජ්‍ය වේදිනිගම විමලතිස්ස හිමි විසින්, තමන් වහන්සේ පාර්ලිමේන්තුව සඳහා තෝරාගෙන ඇති බවට වූ ලිපියක් මැතිවරණ කොමිසම වෙත යැවීමත් සමගය.
මේ අතර පූජ්‍ය පාහියන්ගල ආනන්ද සාගර හිමියන් පැවසුවේ ඥානසාර හිමි මන්ත්‍රී ධුරයට තෝරාගත් බවට මැතිවරණ කොමිසමට නිල වශයෙන් දැනුම්දීමේ වගකීම ඇති පක්ෂයේ මහ ලේකම් පූජ්‍ය වේදිනිගම විමලතිස්ස හිමියන් මේ වනවිට අතුරුදන්ව ඇති බවය.
