නිකෝබා(ර්) දූපතේ වරායක් – කොළඹ වරායට අභියෝගයක් වෙයිද ?
කොළඹ වරායේ ප්‍රතිනැව්ගත කිරීමේ මෙහෙයුම් සඳහා අභියෝගයක් එල්ල කරමින් ඉන්දියාව විසින් නව වරායක් ඉදි කිරීමට සැලසුම් කර තිබේ.
නිකෝබා(ර්) දුපතේ ඉදිකරනු ලබන මෙම වරාය සඳහා ඉන්දියානු රුපියල් කෝටි 10,000ක මුදලක් ආයෝජනය කිරිමට නියමිතය.
චෙන්නායි සිට නිකොබා දූපතට මුහුදු පතුලෙන් සම්බන්ධ කළ අධිවේගී සන්නිවේදන කේබල් පද්ධතිය විවෘත කරමින් ඉන්දීය අග්‍රාමාත්‍යවරයා නිකෝබා(ර්) වරාය පිළිබදව සිය සැළැස්ම පළමු වරට අනාවරණය කළේය.
මෙම යෝජිත වරාය භූමිය පිහිටා ඇත්තේ, ඉන්දියානු සාගරය සහ පැසිෆික් සාගරය අතර ප්‍රධාන නැව් මාර්ගය වන මලක්කා සමුද්‍ර සන්ධියේ මුඛයේ පිහිටා ඇති ඉන්දියාවට අයත් නිකෝබා(ර්) දිවයිනේය.
නාවික කටයුතුවලදී මෙය ඉතා වැදගත් මුහුදු මාර්ගවලින් එකක් ලෙස සැලකෙන අතර දකුණු චීන මුහුද හරහා බොරතෙල් රැගෙන යන නෞකාවලින් සියයට 90කට වඩා වැඩි ප්‍රමාණයක් මලක්කා සමුද්‍ර සන්ධිය හරහා ගමන් කරනු ලබයි.
තායිලන්ත බොක්ක අන්දමන් මුහුද හා සම්බන්ධ කරන හා ජපානයට හා චීනයට තෙල් නැව්ගත කිරීම සඳහා කිලෝමීටර් 1,200කින් කෙටිකරන අලුත්තෙන් නිර්මාණය කළ ක්‍රා ඇළ යෝජිත වරාය ආසන්නයේ පවතියි.
ඒ අනුව නිකෝබා(ර්) දූපතේ දකුණු කොටසේ තීරු බදුවලින් නිදහස් ගබඩා සංකීර්ණ කලාපයක් ඉදිකර බහලුම් ප්‍රතිනැව්ගත කිරීමේ මධ්‍යස්ථානයක් සකස් කිරීමට ඉන්දීය රජයේ අරමුණ වී තිබේ.
ඉන්දීය මාධ්‍ය වාර්තා කළේ, කොළඹ, සිංගප්පූරුව සහ මලයාසියාවේ ක්ලැන්ග් වරායට යෝජිත වරාය විකල්පයක් වනු ඇති බවය.
හම්බන්තොට වරාය චීනය සතුවීමත් සමග ඉන්දියාව ප්‍රතිනැව්ගත කිරීමේ වරායක් ලෙස කොළඹ වරායේ නැගෙනහිර පර්යන්තය අත්පත් කර ගැනීමට පසුගිය කාලය පුරා දැඩි උනන්දුවක් දැක්වීය.
කෙසේවෙතත් වරාය වෘත්තිය සමිති ඊට දැක්වූයේ දැඩි විරෝධයකි.
කෙසේවෙතත් භූ විෂමතා සිතියම් නිරීක්ෂණය කිරීමේදී ඉන්දියාව සැලසුම් කරන ලද මෙම වරාය පිහිටා ඇත්තේ, මීට පෙර නිරන්තරයෙන් භූ කම්පනවලට ලක්ව ඇති කලාපයකය.
ඉන්දියාවට අයත් අන්දමන් සහ නිකෝබා(ර්) දූපත් ආශ්‍රිතව අවසන් වරට භූ කම්පනයක් සිදුවන්නේ, ජූලි 17 වැනි දාය.
අන්දමන් සහ නිකෝබා(ර්) දූපත්වල අගනුවර වන පෝට් බ්ලෙයාර් වරාය නගරයේ සිට කිලෝමීටර් 250ක් නැගෙනහිරින් එහි අපකේන්ද්‍රය පිහිටා තිබුණි.
