අඟුරුවාතොට බටගොඩ හන්දියේ දී පුද්ගලයකුට තියුණු ආයුධවලින් පහරදී ඝාතනය කළ බව කියන ප්‍රධාන සැකකරු ලුණුගම්වෙහෙර ප්‍රදේශයේ නිවසක සැඟවී සිටියදී අත්අඩංගුවට ගත් බව පොලීසිය පවසයි.
සැකකරු අදාළ ඝාතනය සිදුකළ දින හැඳ සිටි බව කියන ඇඳුම් පැළඳුම් ද පොලීසිය විසින් සොයාගෙන තිබේ.
මෙම සැකකරුගේ පියා ද මේ වනවිට පොලිස් අත්අඩංගුවට ගෙන ඇති අතර ඝාතනයට සම්බන්ධ බව කියන මව සහ සොහොයුරෙක් ප්‍රදේශයෙන් පළාගොස් ඇත.
ඉකුත් 17 වනදා බටගොඩ ප්‍රදේශයේ පැවැති මංගල උත්සවයක දී ඇතිවූ බහින්බස්වීමක් දුරදිග යෑමෙන් අනතුරුව මඟ රැක සිටි සැකකරුවන් විසින් මංගල ප්‍රේමවර්ධන නමැති 36 හැවිරිදි පුද්ගලයෙකුට තියුණු ආයුධවලින් පහර පහරදී ඝාතනය සිදුකර තිබුණි.
එම ඝාතනය සඳහා යොදාගත් තියුණු ආයුධය සොයා ගැනීම සඳහා අත්අඩංගුවට ගත් ප්‍රධාන සැකකරුගෙන් දීර්ඝ ලෙස ප්‍රශ්න කරන බවද පොලිස් නිලධාරියෙකු පැවසීය.
ඒ අනුව සිද්ධිය සම්බන්ධයෙන් අඟුරුවාතොට පොලීසිය වැඩිදුර පරීක්ෂණ සිදුකරයි.
