අතුරුදන්ව සිටි බදුල්ල ශික්ෂණ රෝහලේ නිර්වින්දන විශේෂඥ වෛද්‍ය ප්‍රභාත් අනුරාධ දයාරත්න මහතා ඖෂධ පානය කර සියදිවි නසාගෙන ඇති බවට පොලිසිය සැක පළ කරයි.
වෛද්‍යවරයාගේ මෘත ශරීරය අද (24) පෙරවරුවේ බදුල්ල–මහියංගනය මාර්ගයේ 17 කණුව, මාපාකඩවැව ප්‍රදේශයේ වන ලැහැබක තිබියදී පොලිසිය සහ යුද හමුදාව එක්ව සිදුකළ විශේෂ මෙහෙයුමකදී සොයාගෙන තිබේ.
මෘත ශරීරය තිබූ ස්ථානයේ තිබී ඖෂධ වර්ග තුනක් ද පොලිසිය විසින් සොයාගෙන ඇත.
වෛද්‍යවරයා ඊයේ (23) පෙරවරුවේ සිට අතුරුදන්ව ඇති බවට ලද තොරතුරක් මත පොලිසිය විමර්ශන ආරම්භ කර තිබිණි.
එහිදී ඔහුට අයත් මෝටර් රථය ඊයේ රාත්‍රියේ බදුල්ල–මහියංගනය මාර්ගයේ 17 කණුව ආසන්නයේ තිබී සොයාගෙන තිබේ.
ඒ අනුව පොලිසිය සහ යුද හමුදාව එක්ව සිදුකළ සෙවීම් මෙහෙයුමේදී මෝටර් රථය තිබූ ස්ථානයේ සිට මීටර් 800ක් පමණ දුරින් වන ලැහැබක ගලක් මත තිබූ වෛද්‍යවරයාගේ මෘත ශරීරය අද උදෑසන සොයාගෙන ඇත.
වෛද්‍යවරයා දීර්ඝ කාලයක සිට මානසික ආතතිය සඳහා ඖෂධ ලබාගෙන ඇති බවට ද පොලිසිය අනාවරණය කරගෙන තිබේ.
සිද්ධිය සම්බන්ධයෙන් මහියංගන පොලිසිය වැඩිදුර විමර්ශන සිදුකරයි.
