නිරෝධායන රීති උල්ලංඝනය කරමින් කොළඹ තරු පන්තියේ හෝටලයක පැවැත්වූ උපන්දින සාදයේ විමර්ශන කටයුතු කොළඹ අපරාධ කොට්ඨාසය වෙත භාරදී ඇති බව පොලිස් මාධ්ය ප්රකාශක, නියෝජ්ය පොලිස්පති අජිත් රෝහණ මහතා පවසයි.
කෙසේ වෙතත් මෙහි මූලික කටයුතු තවදුරටත් කොටුව පොලිස් ස්ථානය මගින් සිදු කරමින් පවතී.
අදාළ සිද්ධිය පිළිබඳව වැඩිදුරටත් කරුණු පැහැදිලි කරන පොලිස් මාධ්ය ප්රකාශක, නියෝජ්ය පොලිස්පති අජිත් රෝහණ මහතා කියා සිටියේ,
“එම උපන්දින සාදයට අදාළව විද්යාත්මක සාක්ෂි සහ තාක්ෂණික සාක්ෂි සෙවීම සඳහා කොළඹ අපරාධ කොට්ඨාසය වෙත භාරදී තිබෙනවා. විශේෂයෙන්ම CCTV දත්ත සහ ඊට අදාළ අනෙකුත් දත්ත සම්බන්ධව තොරතුරු ලබා ගැනීමට.”
පසුගිය 30 වැනිදා මධ්යම රාත්රීයේ කොළඹ තරු පහේ හෝටලයක දී නිරෝධායන රීතින් උල්ලංඝනය කරමින් උපන්දින සාදයක් පවත්වා තිබුණි.
රූපලාවන්ය ශිල්පී චන්දිමාල් ජයසිංහ සහ මෝස්තර නිරූපණ ශිල්පිනි පියුමි හංසමාලි අදාළ උපන්දින සාදය සංවිධානය කර තිබු බව පැවසේ.
