ඉන්දු ලංකා බැතිමතුන්ගේ සහභාගීත්වයෙන් පැවැත්වෙන කච්චතිව් ශාන්ත අන්තෝනි දේවස්ථානයේ වාර්ෂික මහා මංගල්‍ය අද සහ හෙට යන දෙදින තුළ පැවැත්වීමට නියමිතව තිබේ.
යාපනය දිස්ත්‍රික් ලේකම් කාර්යාලය සඳහන් කළේ යාපනය දිසාව භාර රදගුරු ජස්ටින් ඥාන ප්‍රකාශම් පියතුමාගේ ප්‍රධානත්වයෙන් කච්චතිව් මහා මංගල්‍ය පැවැත්වීමට කටයුතු සංවිධානය කර ඇති බවය.
ඉන්දීය බැතිමතුන් 1000 ක පමණ පිරිසක් කච්චතිව් මංගල්‍ය වෙනුවෙන් පැමිණෙනු ඇති බවට අපේක්ෂා කරන බව එම කාර්යාලය පැවසීය.
මේ සඳහා ප්‍රවාහන, පානීය ජලය, සනීපාරක්ෂක පහසුකම්, තාවකාලික කුටි ආදී යටිතල පහසුකම් සැපයීම නාවික හමුදාවේ සහයෙන් සිදුකෙරෙයි.
මංගල්‍යයට සහභාගීවන මෙරට බැතිමතුන් වෙනුවෙන් අද යාපනය කුරිකට්ටුවාන් ජැටියේ සිට නාවික බෝට්ටු සේවයක් ක්‍රියාත්මක කිරීමටද පියවර ගෙන ඇති බවද නාවික හමුදාව සදහන් කළේය.
