යුද්ධයෙන් අතුරුදන් වු පුද්ගලයින්ගේ පවුල්වල කාන්තාවන් පිරිසක් අද(08) පෙරවරුවේ සිට ත්‍රිකුණාමලයේ පිහිටි නැගෙනහිර පළාත් ආණ්ඩුකාර කාර්යාලය ඉදිරිපිටට රැස්වී විරෝධතා පුවරු ප්‍රදර්ශණය කරමින් සිටි අතර ඔවුන්ගේ දුක් ගැනවිලි ඇසිම සඳහා පළාත් ආණ්ඩුකාර අනුරාධා යහම්පත් මහත්මිය එම ස්ථානයට ගියාය.
අතුරුදන් වූ සිය පවුල්වල සාමාජිකයින්ගේ මරණ සහතික ලබා ගැනීමට ඇති බාධාවන් සහ ආර්ථික ගැටළු පිළිබදව එම කාන්තාවන් මෙහිදී ආණ්ඩුකාරවරියට පැවසුහ.
ආණ්ඩුකාරවරිය එම කාන්තාවන්ට පවසා සිටියේ ඔවුන්ට පවතින ගැටළු වෙන් වෙන්ව ආණ්ඩුකාර කාර්යාලය මගින් ස්ථාපිත කර ඇති සමාජ අසාධාරණයන්ට ලක්වූ පුද්ගලයින්ගේ ගැටළු විමසා බැලීමේ කමිටුවට ඉදිරිපත් කිරීමට කටයුතු කරන ලෙසයි.
එසේ ඉදිරිපත් කිරීමෙන් පසු ඔවුන්ගේ ගැටළු සඳහා විසදුම් ලබාදිමේ කටයුතු සිදු කිරීමට හැකි බවද ආණ්ඩුකාරවරිය කියා සිටියාය.
ජාත්‍යන්තර කාන්තා දිනය යෙදෙන අද දිනයේ ආණ්ඩුකාර කාර්යාලය ඉදිරිපසට පැමිණි එම කාන්තාවන්ට ආණ්ඩුකාරවරිය අතින් සිසිල් පැන් සංග්‍රහයක් ලබාදීම ද විශේෂත්වයකි.
අනතුරුව මද වේලාවක් එම ස්ථානයේ සිටි එම කාන්තාවන් පිරිස ඉන් ඉවත්ව ගියහ.
