ජල ගැලීම්වලින් විපතට පත් අම්බලන්තොට ජනතාවට කඩිනමින් සහන සලසන ලෙසට නියෝජ්‍ය කථානායක අජිත් රාජපක්ෂ මහතාගෙන් උපදෙස්
වලවේ ගඟ පිටාර ගැලීම හේතුවෙන් විපතට පත් අම්බලන්තොට ජනතාවට කඩිනමින් සහන සලසන ලෙස පාර්ලිමේන්තුවේ නියෝජ්‍ය කථානායක අජිත් රාජපක්ෂ මහතා විසින් හම්බන්තොට දිස්ත්‍රික්කයේ ආපදා කළමනාකරණ ඒකකය අම්බලන්තොට ප්‍රාදේශීය ලේකම් කාර්යාලය ඇතුළු අදාළ නිළධාරීන්ට උපදෙස් ලබාදෙන ලදී.
නියෝජ්‍ය කථානායක අජිත් රාජපක්ෂ මහතා මෙසේ උපදෙස් ලබාදුන්නේ අම්බලන්තොට ප්‍රාදේශීය ලේකම් කොට්ඨාශයේ බෝලාන ප්‍රදේශයේ ජල ගැලීම්වලින් පීඩාවට පත් ජනතාව හමුවීමට ගිය අවස්ථාවේදීය.
බෝලාන මහා විද්‍යාලයේ සහ මැලේ කොළණිය මුස්ලිම් පල්ලියේ දැනට අවතැන් පිරිස් තාවකාලිකව සිටින අතර එම පිරිස් හමුවු නියෝජ්‍ය කථානායක අජිත් රාජපක්ෂ මහතා ඉන්පසුව අදාළ බලධාරීන්ට උපදෙස් ලබා දුන්නේ අවශ්‍ය පහසුකම් සැලසීමට කඩිනමින් පියවර ගන්නා ලෙසයි.
දැනට පවුල් 100 කට ආසන්න පිරිසක් මෙම ස්ථාන දෙකේ තාවකාලිකව සිටින අතර ඔවුන්ට අවශ්‍ය ආහාර පාන අම්බලන්තොට ප්‍රාදේශිය ලේකම් කාර්යාලය මඟින් ලබාදෙයි.
ජල මට්ටම අඩුවු පසුව මෙම පවුල්වලට ඔවුන්ගේ නිවාස වෙත යාහැකි බවත් ඔවුන්ට අවශ්‍ය පහසුකම් ලබාදීමට අම්බලන්තොට ප්‍රාදේශීය ලේකම් කාර්යාලය සමඟ හම්බන්තොට දිස්ත්‍රික්කයේ ආපදා කළමාකරණ ඒකකය, අම්බලන්තොට ප්‍රාදේශීය සභාව, අම්බලන්තොට පොලිසීය,අගුණුකොළපැලැස්ස පොලිසීය, යුධ හමුදාව, ලංකා විදුලිබල මණ්ඩලය ඇතුළු ආයතන කිහිපයක්ම උපරිම සහයෝගය ලබාදෙන බවත් අම්බලන්තොට ප්‍රාදේශීය ලේකම් එන්.ඩී.පී. රණසිංහ මහත්මිය ප්‍රකාශ කළාය.
