ඩෙංගු මර්දන මෙහෙයුම් සඳහා සෞඛ්‍ය අමාත්‍යාංශයෙන් නව මධ්‍යස්ථානයක් ස්ථාපිත කෙරේ.
නොවැම්බර් 09 සිට 14 දක්වා විශේෂ ඩෙංගු මර්දන සතියක්.
ඩෙංගු මර්දන මෙහෙයුම් සහ සම්බන්ධීකරණ කටයුතු විධිමත්ව හා කඩිනම්ව පවත්වාගෙන යාම සඳහා සෞඛ්‍ය හා ජනමාධ්‍ය අමාත්‍යාංශයේ නව ‘ඩෙංගු මදුරු මර්දන මෙහෙයුම් කාර්යාලයක්’ ඊයේ (09) ස්ථාපිත කෙරිණි.
සෞඛ්‍ය අමාත්‍යාංශයේ ආපදා පෙරසූදානම් සහ ප්‍රතිචාර අංශය (DPRD) කේන්ද්‍ර කරගනිමින් මෙම මධ්‍යස්ථානය ආරම්භ කර ඇත.
පවතින කාලගුණික වෙනස්වීම් හමුවේ මදුරු ඝණත්වය වැඩිවීම සහ රෝගීන් වාර්තා වීමේ ප්‍රවණතාව සැලකිල්ලට ගනිමින්, නොවැම්බර් 09 වනදා සිට 14 වනදා දක්වා ක්‍රියාත්මක වන පරිදි මෙම විශේෂ ඩෙංගු මර්දන සතිය ප්‍රකාශයට පත් කර තිබේ.
ඩෙංගු අවදානම පවතින දිස්ත්‍රික්ක 13ක සෞඛ්‍ය වෛද්‍ය නිලධාරී කොට්ඨාස 74ක් ආවරණය වන පරිදි ක්‍රියාත්මක එම මර්දන සතියේ කටයුතු නව මෙහෙයුම් කාර්යාලය හරහා පාලනය කෙරේ.
නව කාර්යාලය ස්ථාපිත කිරීමෙන් අනතුරුව, සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතාගේ ප්‍රධානත්වයෙන් මෙම සතිය තුළ සිදුකළ යුතු කාර්යයන් සහ අනුගමනය කළ යුතු පියවර සම්බන්ධයෙන් අදාළ නිලධාරීන් සමඟ විශේෂ සාකච්ඡාවක් ද ඊයේ (09) එහිදී පැවැත්විණි.
මෙම අවස්ථාවට සෞඛ්‍ය හා ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ, අතිරේක ලේකම් (වෛද්‍ය සේවා) ඩබ්ලිව්.කේ. වික්‍රමසිංහ, අතිරේක ලේකම් (මහජන සෞඛ්‍ය සේවා) වෛද්‍ය එස්. මහේන්ද්‍ර ආර්නෝල්ඩ්, ජාතික ඩෙංගු මර්දන ඒකකයේ (NDCU) අධ්‍යක්ෂ වෛද්‍ය කපිල කන්නංගර, ආපදා පෙරසූදානම් සහ ප්‍රතිචාර අංශයේ ප්‍රධානී වෛද්‍ය අසංක වෙදමුල්ල, ඩෙංගු මර්දන ඒකකයේ විශේෂඥ වෛද්‍ය ප්‍රශිලා සමරවීර යන මහත්ම මහත්මීන් මෙන්ම ක්ලීන් ශ්‍රී ලංකා ලේකම් කාර්යාලය, ශ්‍රී ලංකා පොලීසිය, ත්‍රිවිධ හමුදාව සහ ස්වේච්ඡා සංවිධාන නියෝජනය කළ නිලධාරීන් ඇතුළු පිරිසක් එක්ව සිටියහ.
සෞඛ්‍ය හා ජනමාධ්‍ය අමාත්‍ය මාධ්‍ය අංශය
2026-11-10
