පක්ෂ කිහිපයක ජාතික ලැයිස්තු මන්ත්‍රී ධූර පිළිබඳ ව මත ගැටුම්
මේ වන විට දේශපාලන පක්ෂ 3 ක් තම ජාතික ලැයිස්තු මන්ත්‍රී ධුර සඳහා නම් කළ පුද්ගලයන්ගේ ලැයිස්තුව මැතිවරණ කොමිසම වෙත භාර දී තිබේ.
මැතිවරණ කොමිසමේ ප්‍රකාශකයෙකු සඳහන් කළේ ශ්‍රී ලංකා පොදුජන පෙරමුණ, අපේ ජනබල පක්ෂය සහ ඉලංගෙයි තමිල් අරසුකච්චි යන පක්ෂ තම අපේක්ෂකයන්ගේ නම් භාරදී ඇති බවය.
ජාතික ජනබලවේගය පක්ෂයට හිමිවූ ජාතික ලැයිස්තු මන්ත්‍රී ධුරය සඳහා අද අපේක්ෂකයෙකු නම් කරන බව එම පක්ෂය සඳහන් කළේය.
මෙවර මැතිවරණයේදී සමගි ජන බලවේගය පක්ෂයට ජාතික ලැයිස්තු මන්ත්‍රී ධුර 7ක් හිමි වූ අතර ඊට අදාළ අපේක්ෂකයන්ගේ නම් දේශපාලන පක්ෂ සමග සාකච්ඡා කර ඉදිරිපත් කිරීමට නියමිතය.
මීට අමතරව ජාතික ලැයිස්තු මන්ත්‍රී ධුර හිමිකර ගත් එක්සත් ජාතික පක්ෂය සහ අහිල ඉලංකෙයි තමිල් කොංග්‍රසය මේ වන තෙක් ජාතික ලැයිස්තු මන්ත්‍රී ධුරය සම්බන්ධයෙන් අවසන් තීරණයක් ගෙන නැත.
ලබන 14 වන දිනට පෙර අදාළ මන්ත්‍රී ධුර සඳහා අපේක්ෂකයන් නම් කළ යුතු වේ.
මේ අතර, සමගි ජන බලවේගය පක්ෂයෙන් පාර්ලිමේන්තුවට තේරී පත් වූ මන්ත්‍රී කණ්ඩායමේ විශේෂ සාකච්ඡාවක් අද (10) පැවැත්වීමට නියමිතය.
අද පස්වරු 06.00 ට කොළඹ දී එම සාකච්ඡාව පැවැත්වෙන බව සමගි ජනබලවේගය පක්ෂයෙන් පාර්ලිමේන්තුවට තේරී පත් වූ අශෝක් අබේසිංහ මහතා පැවසුවේය.
