ලබන ජනවාරි මාසය වන විට ශ්රී ලංකා පොලිසිය සඳහා නව නිල ඇඳුමක් හඳුන්වා දීමට කටයුතු කරන බව මහජන ආරක්ෂක හා පාර්ලිමේන්තු කටයුතු අමාත්ය ආනන්ද විජේපාල මහතා පවසයි.
කෙසේ වෙතත්, මෙම වෙනස නිල ඇඳුමට පමණක් සීමා නොකර පොලිස් සේවයේ සමස්ත ගුණාත්මකභාවය ඉහළ නැංවීම රජයේ අරමුණ බව අමාත්යවරයා සඳහන් කළේය.
රූපවාහිනී නාලිකාවක පැවති වැඩසටහනකට එක්වෙමින් ඔහු පැවසුවේ පොලිස් සේවය මේ වන විට දේශපාලනීකරණයෙන් මුළුමනින්ම නිදහස් කර ඇති බවයි.
කිසිදු බාහිර බලපෑමකින් තොරව ස්වාධීනව විමර්ශන සිදු කිරීමට අවශ්ය පසුබිම සහ පහසුකම් පොලිස් නිලධාරීන්ට සලසා දී ඇති බව ද අමාත්යවරයා පැවසීය.
පාතාල ක්රියාකාරීන්ගෙන් එල්ල වන තර්ජන හමුවේ පොලිසිය කිසිසේත් පසුබට නොවන බව ද ඔහු අවධාරණය කළේය.
මේ අතර, පොලිස් සේවයේ පවතින නිලධාරී හිඟය මඟහරවා ගැනීම සඳහා මේ වසර තුළ නවක නිලධාරීන් 10,000ක් බඳවා ගැනීමට පියවර ගෙන ඇති අතර, ඉන් 6,000කට ආසන්න පිරිසක් මේ වන විට සේවයට අන්තර්ග්රහණය කර ඇති බව ද අනාවරණය විය.
පොලිස් නිලධාරීන්ගේ වැටුප් ගැටලුව සම්බන්ධයෙන් අදහස් දක්වමින් අමාත්යවරයා සඳහන් කළේ පොලිස් සේවයටම ආවේණික වූ සුවිශේෂී වැටුප් ව්යුහයක් සකස් කිරීම සඳහා අමාත්ය මණ්ඩල තීන්දුවක් ගෙන ඇති බවයි. ඒ සඳහා වන අනුකමිටුවක් ද මේ වන විට ක්රියාත්මක බව ඔහු පැවසීය.
එමෙන්ම පොලිස් නිලධාරීන් සඳහා අවදානම් දීමනාවක් ලබාදීම සම්බන්ධ කරුණු ජනාධිපතිවරයා වෙත ඉදිරිපත් කර ඇති බව ද අමාත්යවරයා සඳහන් කළේය.
පොලිසියේ බාහිර ප්රතිරූපය වෙනස් කිරීමට සමගාමීව, මහජනතාව සමඟ සමීපව කටයුතු කරන වඩාත් මිත්රශීලී සහ ගුණාත්මක පොලිස් සේවාවක් රට තුළ ස්ථාපිත කිරීම සඳහා අවශ්ය සියලු පියවර ගන්නා බව ද අමාත්ය ආනන්ද විජේපාල මහතා වැඩිදුරටත් ප්රකාශ කළේය.
