මහනුවර පොලිස් වසමේ, හන්තාන තපෝදාරාම මාවතේ දී හන්තාන මාර්ගයේ සිට තපෝදාරාම මාර්ගයේ ගමන් කරමින් තිබු බැකෝ යන්ත්‍රයක් පෙරළී පුද්ගලයෙක් ජීවිතක්ෂයට පත්ව තිබේ.
ඊයේ (02) දහවල් මෙම අනතුර සිදුව ඇත්තේ, හිරැස්සගල දෙසට ධාවනය වෙමින් තිබු බැකෝ යන්ත්‍රය කඳුකර ප්‍රදේශයක් පසුකර යෑමේ දී එක්වරම පිටුපසට ධාවනය වීමෙනි.
පසුව බැකෝ යන්ත්‍රය මාර්ගයෙන් ඉවතට පැන මීටර 15ක් පමණ ප්‍රපාතයට පෙරළී ගොස් තිබේ.
අනතුරින් බැකෝ යන්ත්‍රයේ රියදුරු හා එහි ගමන් කළ පුද්ගලයින් දෙදෙනෙක් තුවාල ලබා මහනුවර රෝහලට ඇතුළත් කිරීමේ දී එක් පුද්ගලයෙක් ජීවිතක්ෂයට පත්ව ඇත.
මියගොස් ඇත්තේ වයස අවුරුදු 37ක් වු ගුන්නෑපාන ප්‍රදේශයේ පදිංචිකරුවෙකි.
බැකෝ යන්ත්‍රයේ රියදුරු හා අනෙක් පුද්ගලයා මහනුවර රෝහලේ ප්‍රතිකාර ලබයි.
මහනුවර පොලීසිය වැඩිදුර විමර්ශන සිදුකරයි.
