මෙරට වැඩිම දෛනික ආසාදිතයින් වාර්තා වේ

දිනක් තුළ මෙරටින් වාර්තා වූ වැඩිම කොවිඩ් – 19 ආසාදිතයින් සංඛ්‍යාව ලෙස ආසාදිතයින් 997 දෙනෙකු ඊයේ (27) දිනය තුළ හඳුනාගත් බව සෞඛ්‍ය අමාත්‍යාංශය පවසයි.

මීට පෙර මෙරටින් වාර්තා වූ වැඩිම ආසාදිතයින් සංඛ්‍යාව ලෙස ආසාදිතයින් 976 දෙනෙකු හඳුනා ගැනුණේ පසුගිය පෙබරවාරි මස 09 වනදා ය.

ඊයේ (26) දිනයේ හඳුනාගත් ආසාදිතයින් සංඛ්‍යාවත් සමග මේ වනවිට මෙරටින් හමුවූ සමස්ත කොවිඩ් -19 ආසාදිතයින් සංඛ්‍යාව 102,376ක්.

ඉන් ආසාදිතයින් 94,577ක් සුවය ලබා රෝහල්වලින් පිටවගොස් තිබේ.

රෝගීන් 7,152 දෙදෙනෙකු තවදුරටත් රෝහල්ගතව ප්‍රතිකාර ලබන බව සෞඛ්‍ය අමාත්‍යාංශය සඳහන් කරයි.

ඊයේ දිනයේ හඳුනා ගැනුණු ආසාදිතයින් අතර පෑලියගොඩ කොවිඩ් පොකුරේ ආශ්‍රිතයින් 944 දෙනෙකු සහ බන්ධනාගාර කොවිඩ් පොකුරේ ආශ්‍රිතයින් 08 දෙනෙකු සිටී.

විදේශයන්හි සිට පැමිණි පුද්ගලයින් 45 දෙනෙකු ද ඊයේ දිනයේදී කොවිඩ් ආසාදිතයින් ලෙස හඳුනාගෙන ඇති බව සෞඛ්‍ය අමාත්‍යංශය සඳහන් කළේය.

මේ අතර තවත් කොවිඩ් අසාදිත මරණ 03ක් ඊයේ වාර්තාවීමත් සමග මෙරට සමස්ත කොවිඩ් මරණ සංඛ්‍යාව 647 දක්වා ඉහළගොස් ඇත.

ඊයේ වාර්තා වූ කොවිඩ් ආසාදිතයින් දිස්ත්‍රික්ක 24 කින් වාර්තා වී තිබුණි.

ඉන් වැඩිම ආසාදිතයින් සංඛ්‍යාවක් කොළඹ දිස්ත්‍රික්කයෙන් වාර්තා වී ඇති අතර එම සංඛ්‍යාව 173කි.

ගම්පහ දිස්ත්‍රික්කයෙන් 170 දෙනෙකු සහ කළුතර දිස්ත්‍රික්කයෙන් ආසාදිතයින් 74 දෙනෙකු ඊයේ දිනයේ වාර්තා වී තිබුණි.

කොවිඩ් 3වන රැල්ලේ දැඩි බලපෑමක් එල්ල වී ඇති කුරුණෑගල දිස්ත්‍රික්කයෙන් ඊයේ දිනයේදී ආසාදිතයින් 49 දෙනෙකු පමණක් හඳුනාගෙන ඇති අතර පුත්තලම දිස්ත්‍රික්කයෙන් හඳුනාගෙන ඇත්තේ ද ආසාදිතයින් 22ක් පමණි.

ගාල්ල දිස්ත්‍රික්කයෙන් ඊයේ දිනයේ ආසාදිතයින් 92ක් හඳුනාගෙන ඇති බව සඳහන් කරන කොවිඩ් -19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය මොනරාගල දිස්ත්‍රික්කයෙන් ආසාදිතයින් 86 දෙනෙකු හඳුනාගෙන ඇති බව සඳහන් කරයි.

මීට අමතරව මාතලේ දිස්ත්‍රික්කයෙන් ආසාදිතයින් 66ක්, ත්‍රිකුණාමලය දිස්ත්‍රික්කයෙන් ආසාදිතයින් 59ක්, මාතර දිස්ත්‍රික්කයෙන් ආසාදිතයින් 32ක් බදුල්ල දිස්ත්‍රික්කයෙන් ආසාදිතයින් 25ක් නුවරඑළිය සහ පුත්තලම යන දිස්ත්‍රික්කවලින් ආසාදිතයින් 22 බැගින් හඳුනාගෙන තිබේ.

ඊට අමතරව මන්නාරම, කෑගල්ල, අම්පාර, අනුරාධපුරය, වව්නියාව, මහනුවර, රත්නපුර, යාපනය, පොළොන්නරුව, මඩකලපුව, කිළිනොච්චිය සහ හම්බන්තොට යන දිස්ත්‍රික්කවලින් ද ආසාදිතයින් 20 දෙනෙකුට අඩු සංඛ්‍යාවක් හදුනාගෙන ඇති බව කොවිඩ් -19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය සදහන් කළේය.