යුරෝපා සංගමය සහ රජය අතර එකඟතාවයක්
මානව හිමිකම් සහ ප්රතිසංවිධාන ගැටලු පිළිබඳව අඛණ්ඩව සමීපව කටයුතු කිරීමට යුරෝපා සංගමය සහ මෙරට රජය එකඟ වී තිබේ.
යුරෝපා සංගමය සහ ශ්රී ලංකා ප්රජාතන්ත්රික සමාජවාදී ජනරජය සිය 23 වන ඒකාබද්ධ කොමිෂන් සභා රැස්වීම පසුගියදා පැවත් වූ අතර එහිදී එම එකඟතාවයට පැමිණි බව විදේශ අමාත්යාංශය සඳහන් කරයි.
යුරෝපා සංගමයේ සහ මෙරට නව නායකත්වයන් යටතේ පැවති පළමු ඒකාබද්ධ කොමිෂන් සභා රැස්වීම ද මෙයවීම විශේෂත්වයකි.
එම සංගමයේ සහ ශ්රී ලංකාවේ ජනතාව අතර සම්බන්ධතාවය තවදුරටත් ශක්තිමත් කිරීම සඳහා පවතින කැමැත්ත යළි තහවුරු කරමින් යුරෝපා සංගමය සහ ශ්රී ලංකාව පුළුල් විෂයන් රැසක් යටතේ අදහස් හුවමාරු කරගත් බව විදේශ අමාත්යාංශය සඳහන් කළේය.
වෙළඳ සම්බන්ධතා වැඩි දියුණු කිරිමේ වැදගත්කම පිළිබඳව මෙහිදී වැඩි අවධානයක් යොමුව තිබේ.
GSP ප්ලස් යටතේ යුරෝපා සංගමය විසින් මෙරටට ප්රදානය කළ ඒකපාර්ශ්වික තීරුබදු සහනය මගින් මෙරට ආර්ථිකයට සැලකියයුතු අන්දමේ දායකත්වයක් ලබාදී ඇති බවට අදහස් හුවමාරු වී ඇත.
මෙරට සිට යුරෝපා සංගමය වෙත කරන අපනයන යුරෝ බිලියන 2.3ක් දක්වා ඉහළ ගොස් ඇති අතර එමගින් යුරෝපා සංගමය ශ්රී ලංකාවේ දෙවැනි විශාලතම අපනයන වෙළෙඳපොළ බවට පවත්ව ඇති බව සඳහන් ය.
ලබාදී ඇති තීරුබදු සහන වඩාත් හොඳින් භාවිත කිරීමේ හැකියාවක් ශ්රී ලංකා රජය සතුව පවතින බව ඒකාබද්ධ කොමිෂන් සභාව පිළිගත් බවද විදේශ අමාත්යාංශය පවසයි.
