ජගත් සමන්තට ඇප
අනවිළුන්දාව “රැම්සා අභයභූමිය”ට අයත් කොටසක් අනවසරයෙන් එළිපෙහෙළි කිරීම සම්බන්ධයෙන් රිමාන්ඩ් කර සිටි ආරච්චිකට්ටුව ප්‍රාදේශීය සභාවේ හිටපු සභාපති ජගත් සමන්තට හලාවත මහෙස්ත්‍රාත් අධිකරණයෙන් ඇප ලබා දී තිබේ.
රුපියල් ලක්ෂ 10 බැගින් වූ පුද්ගල ඇප දෙකක් මත ජගත් සමන්ත මහතා මුදා හරින ලෙස හලාවත දිසාවිනිසුරු අනුර ඉන්ද්‍රිජිත් බුද්ධදාස මහතා අද (24) පස්වරුවේ නියෝග කර ඇත.
ආනවිළුන්දාව “රැම්සා අභයභූමිය” තුළ ඉස්සන් ගොවිපලක් සකස් පොකුණක් සකස් කිරීමේ සිද්ධියක් සම්බන්ධයෙන් හිටපු ආරච්චිකට්ටුව ප්‍රාදේශීය සභාවේ සභාපතිවරයාව රක්ෂිත බන්ධනාගර ගත කර තිබුණි.
වනජීවී දෙපාර්තමේන්තුවේ පුත්තලම සහකාර අධ්‍යක්ෂකවරයා විසින් ආරච්චිකට්ටුව පොලීසියට මේ සම්බන්ධයෙන් පසුගිය 26 වැනිදා පැමිණිල්ලක් කර තිබුණි.
ඒ අනුව සිද්ධියට සම්බන්ධ බව කියන පුද්ගලයින් දෙදෙනෙකුව ආරච්චිකට්ටුව පොලීසිය විසින් 27 වැනිදා අත්අඩංගුවට ගනු ලැබීය.
ඉස්සන් පොකුණ සකස් කිරීම සිදුකළ බව කියන ඩෝසර් යන්ත්‍ර ක්‍රියාකරුවා සහ ඒ සඳහා අනුබල දුන් බව කියන ව්‍යාපාරිකයෙකුව එසේ අත්අඩංගුවට ගෙන තිබුණි.
එම සැකකරුවන් දෙදෙනා හලාවත දිසා අධිකරණය වෙත ඉදිරිපත් කිරීමෙන් අනතුරුව රක්ෂිත බන්ධනාගාර ගත කෙරෙණි.
ඔවුන් දෙදෙනාව පසුගිය 19 වැනිදා රුපියල් ලක්ෂ 100 බැගින් වන පුද්ගල ඇප මත මුදා හරිනු ලැබීය.
