උපකුලපතිවරුන් පත් කිරීමේ බලය ජනාධිපති ප්‍රමුඛ දේශපාලන අධිකාරිය සතු වීම නූතන දියුණු සමාජයකට නොගැලපෙන බවත් සමගි ජනබලවේගය ඊට එරෙහි බවත් විපක්ෂ නායක සජිත් ප්‍රේමදාස මහතා පැවසීය.අධ්‍යාපනයේ නිදහස සහ ස්වාධීනත්වය වෙනුවෙන් තමන් කොන්දේසි විරහිතව පෙනී සිටින බවද පැවසීය.
යෝජිත කොතලාවල ආරක්ෂක විශ්ව විද්‍යාල පනත සම්බන්ධයෙන් විශ්වවිද්‍යාල ආචාර්යවරුන්ගේ සංගමය සහ විපක්ෂ නායක සජිත් ප්‍රේමදාස මහතා අතර සාකච්ඡාවක් විපක්ෂ නායක කාර්යාලයේ දී සිදුවිය.
අදාල පනත සහ එයින් සිදුවන අනතුර පිළිබඳව මෙන්ම ඒ පිළිබඳව සමගි ජනබලවේගයේ ස්ථාවරය ද එහිදී සාකච්ඡාවට ගැනින.
නිදහස් අධ්‍යාපනයට එරෙහිව ගෙනෙන කිසිදු වැඩපිළිවෙළකට සමගි ජනබලවේගයේ සහය හිමි නොවන බවත් නිදහස් අධ්‍යාපනය සුරක්ෂිත කිරීම වෙනුවෙන් සමගි ජනබලවේගය ස්තීරසාරව පෙනී සිටින බවත් විපක්ෂ නායකතුමා පැවසීය.
