දිවයින පුරා ප්‍රදේශ කිහිපයක මාරක රිය අනතුරුවලින් ජීවිත තුනක් අහිමි වී තිබේ.
ඉපලෝගම පොලිස් වසමේ හිරිපිටියාගම ගල්නෑව මාර්ගයේ පලුගස්වැව ප්‍රදේශයේදී හිරිපිටියාගම දෙස සිට ගල්නෑව දෙසට ධාවනය වූ යතුරුපැදියක් විදුලි රැහැනක ගැටී අනතුරක් සිදුව ඇත.
අනතුරින් යතුරුපැදිකරු හා පසුපැදිකරු ගල්නෑව රෝහල ට ඇතුළු කිරීමෙන් අනතුරුව 20 හැවිරිදි අක්කර 500, කලාකඹරූව ප්‍රදේශයේ පදිංචි තරුණයෙක් ජීවිතක්ෂයට පත්ව තිබේ.
මේ අතර කුලියාපිටිය – මාදම්පේ මාර්ගයේ ධාවනය වු යතුරුපැදියක් එක්වරම දකුණට හැරවීමට යෑමේ දී අනතුරක් සිදුව ඇත.
එම දිශාවට ම පිටුපසින් පැමිණි තවත් යතුරුපැදියක ගැටී මාර්ගයේ ගමන්ගත් පදිකයෙකුගේ ද, දකුණු පස මාර්ගයෙන් පිටත නවතා තිබූ කාර් රථයක ද ගැටී තිබේ.
අනතුරින් යතුරුපැදිකරුවන් දෙදෙනා හා පදිකයා තුවාල ලබා කුලියාපිටිය රෝහලට ඇතුළත් කර ඇත.
දකුණට හැරවු යතුරුපැදියේ පැදිකරු වැඩිදුර ප්‍රතිකාර සඳහා කුරුණෑගල රෝහලට ඇතුළත් කිරීමේ දී ජීවිතක්ෂණයට පත්ව තිබේ.
එලෙස මියගොස් ඇත්තේ 70 හැවිරිදි කුලියාපිටිය ප්‍රදේශයේ පදිංචිකරුවෙකි.
මේ අතර, ගිරිඋල්ල – කුරුණෑගල මාර්ගයේ දඹදෙණිය නගරයේ දී ගිරිඋල්ල දෙස සිට කුරුණෑගල දෙසට ධාවනය වු බස් රථයක් පදික කාන්තාවකගේ ගැටී අනතුරක් සිදුව ඇත.
අනතුරින් බරපතළ තුවාල ලැබු පදික කාන්තාව දඹදෙණිය රෝහලට ඇතුළත් කිරීමේදී මියගොස් තිබේ.
මියගිය කාන්තාවගේ අනන්‍යතාවය මෙතෙක් තහවුරු වී නොමැති බව පොලීසිය පවසයි.
අනතුර සම්බන්ධයෙන් බස්රථ රියදුරු අත්අඩංගුවට ගෙන ඇත.
