ඔමික්‍රෝන් කොවිඩ් ප්‍රභේදය වාර්තා වූ දකුණු අප්‍රිකාව ට ලොව අනෙකුත් රටවලින් ලැබුණු ප්‍රතිචාරය සම්බන්ධයෙන් දකුණු අප්‍රිකානු ජනාධිපතිවරයා සිය අප්‍රසාදය පළකරයි.
සිරිල් රාමපෝසා පැවසුවේ අනෙකුත් රටවලින් ක්‍රියාත්මක කර ඇති සංචාරක සහ ගුවන්ගමන් තහනම් ඉවත් කළ යුතු බවය.
ඔහු ඒ සම්බන්ධයෙන් එම රටවල් දැඩි ලෙස විවේචනය කළේය.
ඔහු පැවසුවේ එම තීරණ සමග එකඟ විය නොහැකි බවය.
මේ වනවිට එක්සත් රාජධානිය, යුරෝපීය සංගමය සහ අමෙරිකාව ඇතුළු රටවල් සහ කලාප දකුණු අප්‍රිකාව සහ එම කලාපයේ රටවල් කිහිපයකට සංචාරක සීමා පනවා තිබේ.
ඔමික්‍රෝන් කොවිඩ් ප්‍රභේදය සම්බන්ධයෙන් ලෝක සෞඛ්‍ය සංවිධානය පැවසුවේ සියලුදෙනා ඒ සම්බන්ධයෙන් දැඩි අවධානයක් යොමුකළ යුතු බවය.
එය දැඩි ලෙස විකෘතිතා වලට ලක්වී ඇති බවත් පහසුවෙන් පැතිර යා හැකි බවත් ලෝක සෞඛ්‍ය සංවිධානය අනතුරු ඇඟවීය.
ඊයේ (28) දකුණු අප්‍රිකාවෙන් දෛනික ආසාදිතයින් 2,800ක් වාර්තා වී ඇති අතර ඊට පෙර එරටින් දෛනික ආසාදිතයින් හමුවූයේ සාමාන්‍ය වශයෙන් 500ක් පමණි.
මෙම සති අන්තය වනවිට දෛනික ආසාදිතයින් ගණන 10,000ක් පමණ දක්වා ඉහළ යා හැකි බව එරට සෞඛ්‍ය අමාත්‍යවරයා පවසා තිබේ.
