දිවයිනේ ප්‍රදේශ දෙකකින් අමානුෂික මනුෂ්‍ය ඝාතන දෙකක් වාර්තා වී ඇතැයි පොලීසිය සඳහන් කරයි.
ඒ අතර, දෙදෙනෙකු අතර ඇති වූ පුද්ගලික ආරවුලක් දුරදිග යාම හේතුවෙන් පුද්ගලයෙකුගේ කකුල් දෙක, ගස් කපන යන්ත්‍රික කියතකින් කපා බරපතළ තුවාල සිදුකර ඝාතනය කර තිබේ.
ඊයේ (30) දහවල් කාලයේදී එම ඝාතනය සිදුව ඇත්තේ, කටුගස්තොට පොලිස් වසමේ මහංගොඩ ප්‍රදේශයේදී බව පොලීසිය පවසයි.
එලෙස මියගොස් ඇත්තේ, 32 හැවිරිදි පොහොලියද්ද, ගලගෙදර ප්‍රදේශයේ පදිංචිකරුවෙකි.
අදාළ සිද්ධියට සම්බන්ධ සැකකරු ඝාතනය සඳහා යොදාගත් යාන්ත්‍රික කියතද සමග අත්අඩංගුවට ගෙන ඇත.
එම සැකකරු 54 හැවිරිදි මහංගොඩ, කටුගස්තොට ප්‍රදේශයේ පදිංචිකරුවෙකි.
සිද්ධිය සම්බන්ධයෙන් කටුගස්තොට පොලීසිය වැඩිදුර විමර්ශන සිදුකරයි.
මේ අතර ගොකරැල්ල පොලිස් වසමේ රබර්වත්ත ප්‍රදේශයේ නිවසක කාන්තාවක් ව සිය පුතා විසින් ඝාතනය කර තිබේ.
එම කාන්තාවගේ ඔළුවට යකඩ ඉන්නකින් ඇන එම ඝාතනය සිදුකර ඇති බවට පොලීසිය සිදුකළ විමර්ශනවලදී අනාවරණය වී ඇත.
එම ඝාතනය සිදුකළ මියගිය කාන්තාවගේ පුතා මානසික ආබාධයකින් පෙළෙන අයෙකු බව පොලීසිය සඳහන් කරයි.
ඊයේ උදෑසන කාලයේදී එම ඝාතනය සිදුව ඇති බව පොලීසිය පවසයි.
එලෙස මියගොස් ඇත්තේ, 65 හැවිරිදි දෙහෙල්ගමුව, ඉබ්බාගමුව ප්‍රදේශයේ පදිංචිකාරියකි.
ඝාතනය සිදුකළ සැකකරු අත්අඩංගුවට ගැනීම සඳහා ගොකරැල්ල පොලීසිය වැඩිදුර විමර්ශන සිදුකරයි.
