පොලිස් කොස්තාපල්වරයෙක්ට, ඔහුගේ බිරිඳට සහ ඔහුගේ බාල සහෝදරයාට පහරදී කොස්තාපල්වරයා ඝාතනය කිරීමේ සිද්ධියේ සැකකරුවන් හඳුනාගෙන ඇති බව පොලීසිය පවසයි.
පොලිස් මාධ්‍ය ප්‍රකාශකවරයා සඳහන් කළේ සිද්ධිය සම්බන්ධයෙන් තංගල්ල පොලීසිය විමර්ශන සිදුකරන බවය.
ඊයේ (17) රාත්‍රියේ තංගල්ල විතාරන්දෙනිය ප්‍රදේශයේදී මෙම සිද්ධිය ඇතිවී තිබුණි.
සිද්ධියට හේතුව පුද්ගලික ආරවුලක් වන අතර බරපතළ පහරකෑමට ලක්වූ පොලිස් කොස්තාපල්වරයා මියගොස් තිබුණි.
මියගොස් තිබුණේ දක්ෂිණ අධිවේග මාර්ගයේ රාජකාරී කළ චතුරංග දිල්ෂාන් නැමති 36 හැවිරිදි පොලිස් කොස්තාපල්වරයෙකි.
ඔහු පදිංචිව සිටින නිවස ආසන්නයේ පිරිසක් සමග ඇතිවූ පෞද්ගලික ආරවුලක් මත මෙම පහරදීම සිදුකර තිබේ.
එම පොලිස් කොස්තාපල්වරයාගේ බාල සහෝදරයා ද සැකකරුවන්ගේ පහරකෑමට ලක්ව බරපතළ තත්ත්වයේ පසුවන අතර ඔහු මේ වනවිට කරාපිටිය රෝහලේ දැඩි සත්කාර ඒකකයේ ප්‍රතිකාර ලබමින් පසුවෙයි.
පොලීසිය සඳහන් කළේ මෙම පහරදීමට පුද්ගලයින් 15 දෙනෙකු සම්බන්ධවී ඇති බවට තොරතුරු වාර්තාවී ඇති බවත් ඔවුන් හඳුනාගෙන ඇති බවත්ය.
සිද්ධියට සම්බන්ධ ප්‍රධාන සැකකරු ඇතුළු සෙසු සැකකරුවන් කඩිනමින් අත්අඩංගුවට ගැනීම සඳහා විමර්ශන ක්‍රියාත්මක බව තංගල්ල පොලීසිය පවසයි.
