තමා පදිංචිව සිටි නිවසේ අසාමාන්‍ය සහ අවිධිමත් විදුලි බිල්පත් ලැබෙන බව සෞඛ්‍ය අමාත්‍ය කෙහෙලිය රඹුක්වැල්ල මහතා පවසයි.
අදාළ විදුලි බිල්පත් සම්බන්ධයෙන් සමාජ මාධ්‍ය ඔස්සේ පැතිර ගිය ප්‍රචාර සම්බන්ධයෙන් ප්‍රතිචාර දක්වමින් අමාත්‍යවරයා ඒ බව පැවසීය.
ඒ අනුව සිය ෆේස්බුක් ගිණුම ඔස්සේ වීඩියෝවක් පළ කරමින් අමාත්‍ය කෙහෙලිය රඹුක්වැල්ල මහතා පෙන්වා දෙන්නේ, ලංකා විදුලිබල මණ්ඩලය තමන්ට අවිධිමත් සහ අසාමාන්‍ය විදුලි බිල්පත් ලබාදී තිබූ බවය.
අවස්ථා ගණනාවකදී ඔවුන්ගෙන් ඒ පිළිබඳ විමසීම් සිදුකළත් ප්‍රතිචාර නොලැබුණු නිසා වත්මන් තත්ත්වය උද්ගතවී ඇති බව සෞඛ්‍ය අමාත්‍ය කෙහෙලිය රඹුක්වැල්ල මහතා පවසයි.
අමාත්‍යවරයා පදිංචිව සිටි කොළඹ 07, සරණ පාරේ පිහිටි නිවසේදී මෙම තත්ත්වය ඇතිවී තිබුණි.
තමන් මෙම නිවසේ පදිංචියට පැමිණියේ 2015 වසරේ ජනවාරි මසදී බවත් ඒ සමයේදී විදුලි බිල රු. 25,000ත් 30,000ත් වැනි මට්ටමක පැවති නමුත් පසුකාලීනව විදුලි බිල්පත්වල අසාමාන්‍ය වැඩිවීමක් තමන්ට දක්නට ලැබුණු බව ඇමතිවරයා සඳහන් කරයි.
ඇතැම් අවස්ථාවල රුපියල් 760,000, 330,000, 55,000, 75,000, 90,000 වැනි ගාස්තුවලින් යුත් බිල්පත් ලැබුණු අතර ඒවා නිකුත් කර තිබුණේ එහි පෙර සිටි තැනැත්තාගේ නමට බවද ඇමතිවරයා කියා සිටියේය.
ලංකා විදුලිබල මණ්ඩලයට අවස්ථා දෙකකදී මෙම අසාමාන්‍ය තත්ත්වය සම්බන්ධයෙන් තමන් ලිඛිතවත්, අවස්ථා 10 කදී පමණ ඇමතුම් ලබාදී සඳහන් කළ බවත් නමුත් කිසිදු යහපත් ප්‍රතිචාරයක් නොලැබුණු බවත් අමාත්‍යවරයා පැවසීය.
මේ අතර නිවස යළි භාරදීමට අවශ්‍ය වූ නිසා ගෙවීමට ඇති විදුලිබිල ඉල්ලා සිටි අවස්ථාවේදී තමාට ලක්ෂ 70 ක බිල්පතක් එවා ඇත්තේද පෙර සිටි අයගේ නමට බව ඇමතිවරයා සඳහන් කළේය.
ජනවාරි මාසයේදී තමන් එය ගෙවා දැමූ නමුත් ඒ මුදලට රිසිට් පත නිකුත් කර ඇත්තේද තමන්ට පෙර නිවසේ පදිංචිව සිටි පුද්ගලයාගේ නමට බව අමාත්‍යවරයා පැවසීය.
මේ වනවිට මෙම කාරණය නීති මාර්ගයෙන් විසඳා ගැනීමට තමන් සිය නීතීඥයින් වෙත භාරදී ඇති බවත් අමාත්‍ය කෙහෙලිය රඹුක්වැල්ල මහතා පැවසීය.
