උතුරු පළාත සංවර්ධනය කිරීමට ජනාධිපතිවරයා ප්‍රමුඛ රජය බැඳී සිටින බව අග්‍රාමාත්‍ය මහින්ද රාජපක්ෂ මහතා පවසයි.
ඓතිහාසික නාගදීප පුරාණ රජමහා විහාරය පූජා භූමියක් බවට ප්‍රකාශයට පත්කිරීමේ ශ්‍රී සන්නස් පත්‍රය පිළිගැන්වීම සඳහා එම විහාර පරිශ්‍රයේ සංවිධානය කර තිබු වැඩසටහනට එක්වෙමින් අගමැතිවරයා මේ බව කියා සිටියේය.
“උතුරු පළාත කේන්ද්‍රීයව ඇති වු කුරීරු යුද්ධය මේ ප්‍රදේශයේ සංවර්ධනයත් ජනතාවත් විනාශයට පත් කළ බව ඔබට අමුතුවෙන් කිව යුතු නෑ. වසර 30ක බියගුළු යුද්ධයෙන් පසුව මේ විහාරස්ථානය විශාල ලෙස සංවර්ධනයකර ගැනීමට බැතිමතුන්ට වන්දනාකර ගැනීමට අවශ්‍ය පුන්‍ය භූමියක් ලෙසට පත්කර ගැනීමට අපට අවශ්‍ය වුණා. අපි එදත් උතුරේ ජනතාව ආරක්ෂා කළා. අදත් එම ජනතාව ආරක්ෂා කිරීමටත් මේ පළාත සංවර්ධනය කිරීමටත් ජනාධිපතිතුමාත් අපගේ රජයත් බැඳී සිටින බව අප සිහිපත් කරන්න ඕනේ.”
මේ අතර, අග්‍රාමාත්‍ය මහින්ද රාජපක්ෂ මහතා ඊයේ (19) යාපනය ප්‍රෙද්ශයේ ආගමික වැඩටහන් කිහිපයකට සහභාගී වුණි.
එහිදී යාපනය නාවක්කුලිය සමිද්ධි සුමන විහාරස්ථානයේ අභිනවයෙන් ඉදිකළ සංඝාවාසය සඟ සතු කිරීම ද අග්‍රාමාත්‍යවරයාගේ ප්‍රධානත්වයෙන් සිදුකෙරුණි.
යාපනය නාවක්කුලිය සමිද්ධි සුමන විහාරස්ථානයේ අභිනවයෙන් ඉදිකළ සංඝාවාසය සඟ සතු කිරීම අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් සිදුකෙරුණි.
බුද්ධශාසන, ආගමික හා සංස්කෘතික කටයුතු අමාත්‍යාංශය විසින් ශ්‍රී ලංකා යුද හමුදාවේ ශ්‍රම දායකත්වයෙන් මෙය ඉදිකර තිබුණි.
ජාතික නිවාස සංවර්ධන අධිකාරිය යටතේ නාවක්කුලිය නිවාස ව්‍යාපෘතියේ ප්‍රතිලාභින් 36 දෙනෙකුට ඔප්පු ප්‍රදානය කිරීමටත්, ගැබිනි මව්වරුන් 50 දෙනෙකුට පෝෂණ මලු ප්‍රදානය කිරීමටත් අග්‍රාමාත්‍යවරයා එහිදී කටයුතු කර තිබේ.
මේ අතර යාපනය ශ්‍රී නාගවිහාර ජාත්‍යන්තර බෞද්ධ මධ්‍යස්ථානාධිපති ශාස්ත්‍රපති පූජ්‍ය මීගහජදුරේ සිරිවිමල නාහිමි බැහැදැකීමට අග්‍රාමාත්‍යවරයා ඊයේ පැමිණියේය.
එම ප්‍රදේශයේ අඩු අදායම්ලාභී පවුල්වල සිසුන් 50 දෙනෙකු සඳහා අවශ්‍ය පාසල් උපකරණ බෙදාදීමටත් අග්‍රාමාත්‍යවරයා එක්ව සිටියේය.
