ඉන්දියාව තුළ කාන්තාවන් අතිවිශිෂ්ට ජයග්‍රහණයක් අත්පත් කරගත් බව එරට කාන්තා ක්‍රියාකාරිනියන් පවසයි.
ඒ, අවිවාහක කාන්තාවන්ට පළමු සති 24 තුළ ගබ්සා සිදු කරගැනීමට ඇති අයිතිය තහවුරු කරමින් ඉන්දීය උපරිමාධිකරණය තීන්දුවක් ලබාදීම හේතුවෙනි.
අවිවාහක කාන්තාවන්ට ගබ්සා අයිතිය ලබාදෙන ලෙස ඉල්ලා ඉන්දීය අධිකරණය හමුවේ මීට කලකට පෙර පෙත්සමක් ගොනු කෙරුණි.
එම පෙත්සම ගොනුකර තිබුණේ සිය අවිවාහක සහකරුවාගෙන් ගැබ් ගත් කාන්තාවක් තමන්ට ගබ්සා අයිතිය ලබාදෙන්නැයි ඉල්ලා සිටිමිනි.
ඒ අනුව දරුගැබට සති 24කට වඩා අඩු අවිවාහක කාන්තාවන්ට ගබ්සා සිදු කරගැනීමට ඇති අයිතිය තහවුරු කරමින් ඉන්දීය උපරිමාධිකරණය තීන්දුවක් ලබාදී තිබුණි.
තම සිරුර පිළිබඳ තීරණ ගැනීමේ අයිතිය කාන්තාවන් සතුවිය යුතු බව තීන්දුව ලබාදෙමින් අධිකරණය අවධාරණය කර තිබුණි.
එමෙන්ම ඊට තෙවැනි පාර්ශ්වයක බලපෑම එල්ල නොවිය යුතු බවද අධිකරණය සඳහන් කර ඇත.
එමෙන්ම විවාහය තුළදී සැමියාගේ ලිංගික අඩත්තේට්ටම්වලට ලක්වන කාන්තාවන්ට විවාහක දූෂණය යන පදනම යටතේ නීතිමය ක්‍රියාමාර්ග ගැනීමේ අවස්ථාවත් කාන්තාවට ඇති බව මෙහිදී අධිකරණය වැඩිදුරටත් අවධාරණය කර තිබේ.
ඉන්දියාව තුළ ගබ්සා අයිතිය මෙතෙක් හිමිව තිබුණේ ඉන්දීය විවාහක, දික්කසාද, වැන්ඳඹු කාන්තාවන්ට, බාලවයස්කාර දැරියන්ට, මානසික ආබාධ සහිත කාන්තාවන්ට මෙන්ම දූෂණයට ලක්වූ කාන්තාවන්ට පමණි.
ඒ 1971 වසරේදී ගැබ් ගැනීම් නීත්‍යානුකූලව අවසන් කිරීමේ පනත යටතේය.
මේ අනුව අවිවාහක කාන්තාවන්ට ද එම අයිතිය හිමිවීම ඉන්දීය කාන්තාවන් ලැබූ අති විශිෂ්ට ජයග්‍රහණයක් බව කාන්තා ක්‍රියාකාරිනියන්ගේ මතයයි.
