IMF ගිවිසුම ගැන විපක්ෂ නායක සජිත් ගෙන් ආණ්ඩුවට ප්‍රශ්න පත්තරයක්!
රජය, ජාත්‍යන්තර මූල්‍ය අරමුදල (IMF) සමඟ පසුගිය සැප්තැම්බර් මාසයේ දී කාර්ය මණ්ඩල මට්ටමේ ගිවිසුමකට එළැඹි බව වාර්තා වූ අවස්ථාවේ සිටම, එම ගිවිසුමේ අන්තර්ගත කරුණු පාර්ලිමේන්තුව හමුවේ තබන ලෙස අප විසින් බොහෝ අවස්ථාවන්හි දී රජයෙන් ඉල්ලීම් කරනු ලැබීය. එහි අරමුණ වූයේ, සියලුම පාර්ලිමේන්තු මන්ත්‍රීවරුන්ට මේ සම්බන්ධයෙන් තම යෝජනා හා අදහස් ඉදිරිපත් කිරීමට අවස්ථාව සලසා ගැනීමයි. එසේ වුවද, ආණ්ඩුව ඒ කිසිදු ඉල්ලීමක් පිළිබඳව නොතැකූ අතර, මාර්තු මස 20 වැනි දින ජාත්‍යන්තර මූල්‍ය අරමුදලේ විධායක මණ්ඩලයේ අවසන් අනුමැතිය හිමි වන තෙක් කිසිදු තොරතුරක් පාර්ලිමේන්තුවට හෝ මෙරට ජනතාවට දැනගැනීමට ඉඩ නොලැබුණි.
ආණ්ඩුවේ මෙම විනිවිදභාවයෙන් තොර වූ හැසිරීම තරයේ ප්‍රතික්ෂේප කරන බවත් තීරණාත්මක තොරතුරු විකෘති කරමින් ආණ්ඩුව විසින් ජනතාව රවටාලීමට කටයුතු කිරීම ද කණගාටුවට කරුණක් බවත් සඳහන් කරමින් විපක්ෂ නායක සජිත් ප්‍රේමදාස මහතා විසින් අද ආණ්ඩුවෙන් ප්‍රශ්න රැසක් යොමු කරනු ලැබීය.ඒ, 27/2 යටතේ ය.
