නත්තලේ සැබෑ අරුත වටහා ගමු. රට වෙනුවෙන් සියලු දෙනා එකට එක් වෙමු. ජේසුස් ක්‍රිස්තුන් වහන්සේගේ උප්පත්තිය සිහි ගන්වන සාමයේ හා ප්‍රේමයේ සලකුණ මිහි මත තැබූ උතුම් නත්තල උදා වී තිබේ. දෙවියන් වහන්සේගේ ප්‍රේමය සහ මානව ගරුත්වය මනුෂ්‍යත්වය පෙරදැරි සමාජයකට විශ්වසනීය පදනමක් සැකසීය. එදවස ජේසු සමිඳාණන් දේශනා කළ සාමය, ප්‍රේමය, කරුණාව, සහජීවනය, සහකම්පනය වර්තමානයේ අප සමාජය ශිෂ්ටසම්පන්න කිරීමට තරම් හේතු විය. ප්‍රේමය, සාමය හා සහෝදරත්වය තේමා කර ගත් නත්තල ක්‍රිස්තු භක්තිකයන්ගේ ආගමික උත්සවයක් පමණක්ම නොව ලොව පුරා වෙසෙන සියලු ජාතීන්, ආගම්, පක්ෂ, වර්ණ, බාල, තරුණ වැඩිහිටි වෙනසකින් තොරව සමරන සංස්කෘතික උලෙළක් ද වෙයි. මෙහි අරුත නිවැරදිව වටහා ගෙන අප ද රටක් ලෙස ඉදිරියට යාමට කාලය එළැඹ තිබේ. මේ මොහොතේ අප රටේ පවතින බංකොලොත්භාවයෙන් මිදීමට නම් අප ද ජාති, ආගම්, පන්ති, පක්ෂ භේදයකින් තොරව සියලු ම ජනතාව සහෝදරත්වයෙන්, සංහිඳියාවෙන්, ප්‍රේමයෙන් කටයුතු කළ යුතුය. එය රටේත් ජනතාවගේත් දියුණුවට හේතුවන බැව් අප සියලු දෙනා ම අවබෝධ කර ගත යුතුය. එවිට ඊළඟ නත්තල සමරණ මොහොත වන විට සෑම නිවසක ම අපේක්ෂාවේ පහන්සිළු වෙනුවට දියුණුවේ පහන්සිළු දැල්වෙනු ඇත. ශ්‍රී ලංකාවාසී සියලු කිතුනු ජනයාට ප්‍රීතිමත් සුබ නත්තලක් වේවායි ඉත සිතින් ප්‍රාර්ථනා කරමි.
